住村屋使費又平空間又大?村屋冇保安易吸引賊人? 網民熱議:租住村屋到底好定唔好?

2022.09.26

香港地租金高昂,交租隨時都可能要畀人工嘅一半,所以有啲人就會選擇租住租金較平嘅村屋單位,但租住村屋又到底仲有咩好處同壞處呢?最近就有網民喺香港討論區上發文,問租住村屋定係私人樓單位會比較好,結果就引起一眾網民熱烈討論:租住村屋究竟有咩好有咩唔好?

村屋夠靜又夠大?有助減壓同增進人際關係?
樓主表示租住私樓單位同村屋都各有其好處,當同別人講自己租住私樓時,感覺上會較威風,而租住村屋則比起市區環境更為寧靜,空間上亦更大,甚至可隨時上天台燒烤,但喺交通上就比較不便,所以就問網民會傾向租住私樓定係村屋。對於呢個問題,網民們都紛紛發表各自對租住村屋嘅意見,有網民就建議租住村屋,認為村屋地方大之餘亦夠靜:「如果你喜歡靜及空間大,揀村屋」、「住村屋空氣比較好,人少地方大」,更有網民認為住村屋對人際關係以及減壓會有幫助:「村屋面積大,有天台花園更好,親友關係更加密切,BBQ、聚會,冇得頂 ,都市壓力大,晚上喺花園天台坐下飲茶飲啤酒吹下(吓)風,也係一種減壓嘅方法」

住村屋可節省生活使費?疫情下更適合住村屋?

亦有網民認為租住村屋可以節省唔少生活使費:「村屋其實使費好少,無管理費,差向(餉)地租都好平,蚊蟲問題值(直)接在所有窗戶裝好超幼蚊沙(紗),基本上屋內完全無蚊蟲」、「村屋可以裝太陽能板、慳好多電費」,更有網民指喺疫情下租住村屋能減少被感染的機會:「疫情住村屋真係冇得輸,最多三戶人共用一條排水喉」、「村屋有村屋好,市區有市區好,不過疫情期間住村屋真係完全唔怕有橫向垂直傳播。啲人周末要出街唞氣,村屋行上天台就唞到氣,晾衫仲一流」,至於村屋交通較為不便的問題,有網民就建議可租住較鄰近市中心嘅村屋:「如果要租村屋,最好租比較接近市中心或者港鐵站嘅鄉村,咁樣可以取得平衡」

有網民認為村屋空氣好,地方亦較大,有天台的話更可舉辦聚會以增進人際關係及有助減壓。

亦有網民認為住村屋可節省電費、管理費、差餉費等生活使費,亦能減少感染疫情的機會。

村屋冇保安、冇管理客易遭爆竊?
至於壞處方面,有網民就認為租住村屋有較高嘅安全風險,不建議租住村屋:「住村屋有安全風險,容易招惹竊賊或劫匪,住私樓有保安看門口,無閒雜人等進入」、「冇管理,村屋容易比(畀)人爆竊」,更有網民以經驗之談表示村屋爆竊問題嚴重:「真人真事,有人住村屋放工後連門口閘都俾人搬走埋,有時地點極之重要,別以為賊會食齋」、「多年前我單身時住過村屋(將軍澳),比(畀)南亞人爆過兩次格!覺得沒得被(避),只要你外出就會有人去撬你門或擒窗!報完警一樣沒用」

住村屋又嘈又熱又多蚊?有天台未必係好事?
亦有網民認為村屋蚊蟲問題嚴重之餘夏天屋內又熱隔音亦差:「你有呢個諗法,只係你淨係去過人地屋企玩,未真係住過。村屋唔係人人接受得到的,蛇蟲鼠蟻蚊唔係住樓的人能夠想像」、「我租過村屋住,遇到問題都唔少,首先是蚊蟲為患;其次是去水道聲響頗大,首晚入住完全瞓唔到」、「搵個安樂窩,首要條件要安靜同舒服,但係村屋,大熱天時太陽晒(曬)住,焗爐焗蛋糕咁,冷氣開到大一大都唔涼,落樓好方便既(嘅)最多行落三層,但同時你出面D(啲)車聲人聲狗吠聲聽得一清二楚,避無可避」,更有網民指出住村屋擁有天台亦並非一定好:「住頂層包天台,最煩既(嘅)係漏水問題,天台防水做唔足或者老化,到時D(啲)水周屋走,天花板變世界地圖,打風落大雨就麻煩,如果周圍俾樹包(圍)住,掃葉都掃死你」

有網民則認為村屋缺乏保安以及管理,容易被賊人爆竊。

亦有網民認為村屋有多蚊蟲、夏天時感覺極熱以及隔音差等多項問題,更有網民指村屋天台酬注意打理以及保養,否則隨時出現漏水問題。

text/Jonathan
photo/HKET圖片庫

============
同場加映:
【蝸居睇樓團】290呎大埔夫婦上車盤變日式部屋 和風茶室延伸客廳、屏風窗台變打卡位

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【送禮】請您同毛孩免費住酒店!↓

↓立即分享寵物照片 贏走獎品!↓

↓立即分享寵物照片 贏走獎品!↓

↓正嘢!《社群》專區登錄App↓

↓必睇人氣生活+美食主題深度關注組↓

 ↓必睇人氣生活+美食主題深度關注組↓

評語

相關文章