南法河船

文: U Magazine

2020.08.11

於電腦回看旅行相片，記掛着勃艮地那片金黃色葡萄田、靚酒，又想念起超宏偉的亞維儂世界遺產，還有那個下午 hea 在河船甲板邊歎 cocktail、邊賞梵高畫中的隆河堤壩靚景。細味那 8 天的河船南法之旅，從里昂出發，沿索恩河（Saône）和隆河（Rhône）遊走勃艮地、普羅旺斯及阿爾勒等地，不用轉火車、轉酒店，8 日遊船河，輕鬆玩均 6 個城鎮。

好想再放假 ……

好想好想再飛 ……

伴足我們 8 日的 Amadeus Provence，就是法國的家，每日玩完，船就在岸邊等着我們。

河上移動酒店

Amadeus Provence 就像一間移動酒店，4 層高，共 70 間房，房型只分套房和標準艙房，面積約 172 至 284 呎，蝸居般的 size，不過五臟俱全，有齊電視、迷你雪櫃、獨立浴室，每間房還設有衣帽間，將行李篋、大褸全放進去，整齊又慳返唔少位。而房間設計重點於那塊落地大玻璃，午後拿住咖啡窩在窗前，溫暖的陽光灑在身上，河船慢慢前行，窗外是南法的山城、小鎮、森林，靚景像走馬燈般在眼前流過，令人甘願看上一整天。打開窗，深呼吸法式空氣，更要同當地天鵝打招呼！

船尾做 gym 玩 game

坐足 8 日船，點會要你齋睇風景，24 小時健身室、Spa 和遊戲房都集中在船尾，閒時想玩 Board Game 定做 gym 運動一下都可以。上到甲板仲有個無邊際泳池，任你攤住看書曬太陽/ 面對無敵河景浸浴 / 齋坐在 poolside bar 嘗雞尾酒，最緊要夠 chill。到達 Port 之前，仲可以借架單車慢慢遊小鎮。

房間裝備走精緻溫馨路綫，全船只有 8 間的套房更設有小偏廳和露台。

衣帽間比想像中闊落，掛衫之餘，放多兩件行李亦不成問題。

健身室 24 小時開放，內有單車機、划船機、瑜伽球等。

不止桌上遊戲和麻雀，甲板仲有個巨型遊戲，將圓墊推到數字格內，便可得分。

船上單車可以免費借用，這個下午就學法國人踩住兩個轆遊小鎮啦。

船長室設在上甲板，上去賞風景時可以跟 Captain Johnny 閒聊兩句。

河船上竟然有髮廊，恤髮、焗油或 set 頭參加船長晚宴都得，記得要提早預約呀。

船上慢食法國菜

於河船「二樓」Strauss Deck 的餐廳包辦大家三餐，早上有自助餐，麵包沙津粟米片水果熱食，選擇夠多。午餐和晚餐則是 À la carte，法國菜為主，今日食牛肉卷，明天點烤海鮮，後日試埋煎鴨胸，最抵讚是連日的菜單沒有重覆，日日都有新鮮感。謹記一定要留肚食甜品，焦糖燉蛋、Baba au Rhum、朱古力蛋糕……全部都很出色，不吃會後悔喔。