蝦餃燒賣、豬肚鳳爪、叉燒包、馬拉糕⋯⋯對老一輩香港人來說，在熟食亭歎番個一盅兩件早茶，幾乎是大家的集體回憶。時至今日，熟食亭搖身一變成美食大本營，早餐、午餐、晚飯、糖水、宵夜直落之餘，更匯聚了各式各樣的新派美食，令人食指大動！唔信？即刻到大圍美林邨和隆亨邨睇睇啦！
肉餅哥
手機食先 芫茜山上論舌尖
潮流興食芫茜，連熟食亭都見到芫茜的蹤影！由荃灣開到大圍，肉餅哥的肉餅依然多汁又嫩滑，而「芫茜肉餅」加入了地中海芫茜碎之外，落單時更可以向員工免費追加芫茜，成座芫茜山咁樣，睇到都覺得過癮！肉餅哥每天從街市新鮮買入豬肉，再以人手撻成膠，加上肥、瘦肉比例適中，配搭超過30種材料組合，包括「墨汁魷魚漢堡包」及「足三両花膠肉餅」等等，款款真材實料、好味過癮，簡直顛覆了一般人對肉餅的想像！天氣愈來愈凍，冬日限定的「京蔥羊肉煎肉餅」以京蔥僻去羊羶味，齒頰留香，連平時不吃羊的人都食指大動！聽聞即日起只要影低肉餅哥靚肉餅，就有機會贏到一個月任食大獎，鍾意手機食先的朋友又點可以錯過？
肉餅哥小炒料理
地址︰大圍美田路30號美林邨熟食亭5至8號
電話︰9885 6225
芫茜肉餅 $59（午餐）/$69（晚餐）
肉餅內混入切碎地中海芫茜，加上免費追加的芫茜山，成口芫茜味，你又夠唔夠膽挑戰？
墨汁魷魚漢堡包 $61（午餐）／$71（晚餐）
魷魚切粒後調味，氽水後放涼撈入肉餅，再加入墨魚汁並煎香，爽滑彈牙，鍾意食漢堡的話不能錯過！
京蔥羊肉煎肉餅 $59（午餐）／$69（晚餐）
羊肉及豬肉以一比一比例炮製，京蔥能去除羊羶之餘，更添爽脆口感及清香味道。
肉餅哥環境闊落，食都食得更開心！
壹級日本料理
全港獨家 和食首現熟食亭
你冇睇錯，在熟食亭都可以搵到日本菜！壹級日本料理是全港第一間兼唯一一間設於熟食亭內的日式料理餐廳，餐廳將熟食亭的優點發揮得淋漓盡致，保留特高樓底，裝潢開揚，感覺非常舒適。作為熟食亭內的日本餐廳，壹級日本料理選用新鮮食材炮製「角切魚生飯」及「豬扒烏冬」等日式美食。$28起的「壹級下午茶」配搭組合層出不窮，包括「和風牛肉飯」、「黑豚肉薑燒飯」及「迷你三文魚飯」，深受街坊歡迎！
壹級日本料理
地址︰大圍美田路30號美林邨熟食亭1至4號舖
電話︰2813 9368
想不到連熟食亭都有日本菜食，認真創新又獨特！
「壹級下午茶」的迷你魚生粒飯及烏冬下午茶套餐只需$38，非常抵食！
熟食亭內樓底高而寬闊，坐得舒服又完全唔焗促.！
四件壽司、兩件加州卷連一碗味噌湯，亦都只是$28！
大飯糖
又飯又糖 滋味層出不窮
個個都鍾意食甜品，唔通個個都知道邊度有平靚正甜品食咩？被譽為「隱世名人飯堂」的大飯糖，深得娛樂圈名人歡迎，像如何韻詩和鄧達志等都是其座上客，後者甚至曾撰文力推，實力不容忽視！由元朗、天水圍殺到出大圍，大飯糖依然堅持以真材實料炮製各款甜品，像皇牌「Baileys綿綿冰」，綿綿冰上澆上Baileys，香濃幼滑，滋味一試難忘。講到平靚正，大飯糖逢星期一至五更會推出一款$20甜品，街坊價益大家，如此有心，絕對值得支持！
大飯糖甜品小食屋
地址︰大圍美田路30號美林邨熟食亭5至8號舖
電話︰6131 7177
Baileys綿綿冰 $60
加入朱古力脆脆、紅豆及自製河粉等配料的Baileys綿綿冰，上桌時會在雪糕上澆上Baileys，入口香濃，陣陣酒香！
從元朗開到來大圍，大飯糖善用熟食亭優勢，愈開愈大、愈開愈舒服！
心太軟配軟雪糕 $56
心太軟的流心朱古力極香極濃，配以幼滑3.6牛奶味軟雪糕，在冬天能夠嘗到冰火的感覺，好爽！
富記大排檔
特色菜名 食出個謎來
「午夜的花支」、「潮州人條褲」、「有點抱歉的蒸蛋」、「炸醉的豬手」⋯⋯光看這些菜名，你知道會是些甚麼菜式嗎？在隆亨邨內屹立超過27年的富記大排檔，以搞鬼有趣的菜式名字，加上有鑊氣的多款大排檔美食都是吸引人捧場的關鍵。像「小炒王」及「種運雞」等招牌菜，前者特別選用四季豆入饌，入口清爽鮮甜，加上XO醬、銀魚仔及蝦乾等配料，佐酒一流；後者皮脆肉嫩，扯開食更覺過癮！而富記在兩年前重新裝修並加設冷氣之後，環境更為舒適，晚飯、宵夜都值得一試！
富記大排檔
地址︰大圍隆亨村熟食亭10至11號舖
電話︰2696 3497
小炒王 $78
富記招牌小炒王獨特之處，在於選用了翠綠四季豆配以XO醬來炒香蝦乾、銀魚仔及鮮魷魚鬚等配料，加入香脆腰果，鑊氣十足，同朋友宵夜飲酒確係一流！
種運雞 $168
種運雞寓意鴻運當頭，雞隻以十多種香料加以炮製，皮脆肉嫩、惹味多汁，用手扯開食，有風味、夠霸氣！
倒梅可樂 $22
可樂加入話梅和鹹檸，味道酸甜，加上陣陣氣，又爽又開胃。
茄子壹LOOK $78
將新鮮黑墨魚膠釀入原條茄子後落鑊油泡，最後澆上微辣開胃的酸甜芡汁並添上肉碎，惹味彈牙，酸甜開胃，一食上癮！
木櫈、木枱、木頭裝飾，感覺溫暖，這就是富記在邨內屹立多年給大家的感覺吧？
Source: LINKS
」，
App內睇文同睇片可隨時捕捉U Fun彩蛋，
換領現金券及禮品！
↓【免費試用】PHYSIOGEL全新面膜！✨↓
↓ 逆齡秘方㊙️! 實證即時提升肌膚彈性 ↓
↓【必收藏】最新深圳食買玩攻略！↓
↓ 大灣區一小時生活圈！最新打卡熱點／熱門美食等！↓
