【元朗美食】台灣開店回港自創心形雞蛋仔　推限定黑珠誘惑口味

The Waffle Club香港店與台灣店一樣，裝修以粉紅色為主，但不設座位。

客人可選雞蛋仔形狀，有大熱的心型和傳統橢圓形。一份雞蛋仔大約需時3-5分鐘，但店內暫時僅有一部心型雞蛋仔機，想試心型雞蛋仔可能要等啦。

雞蛋仔總共有8種口味，包括經典原味、紅絲絨朱古力、宇治抹茶、伯爵紅茶、朱古力心太軟、流心奶黃、芝士四重奏和意大利黑松露，價錢為$18-30不等。雞蛋仔採用日本麵粉，其餘大部分食材都是外國入口。

雞蛋仔食落啖啖滋味，軟綿富蛋香，並非得個樣。

意大利黑松露雞蛋仔($30)，黑松露味頗濃郁，鹹甜兼備。

芝士四重奏雞蛋仔($30)，內有水牛芝士(Mozzarella)、傑克芝士(Jack Cheese)、車打芝士(Cheddar Cheese)和巴馬臣芝士(Parmesan)，雖然聞落鹹香味十足，食落反而蛋味較搶。

每粒流心奶黃雞蛋仔($30)內都有奶皇餡，不算太流心，但奶皇香甜。

黑珠誘惑($38)是香港店獨家，可選牛奶雪糕、伯爵茶雪糕或兩款混合的扭紋雪糕，配宇治抹茶雞蛋仔。黑糖珍珠頗煙韌，雪糕亦不會太甜膩。

店主阿思稱宇治抹茶雞蛋仔與黑珠、雪糕最夾，兩者味道配合得剛好，並以此為基本組合，如果想轉其他口味雞蛋仔就要加錢(原味除外)。紅絲絨朱古力和伯爵紅茶需加$3，意大利黑松露雞蛋仔需加$5，其餘口味有夾心則不建議選擇。

花心窩夫($28)特色在於中間的花生醬煉奶夾心磚，花生醬味濃，食時又不怕漏出來。

棉花糖焦糖奶茶($25)以伯爵紅茶底配上日本牛奶，杯頂有即製棉花糖。