行山被沙蚤咬傷至肝膽衰竭？ 專家：小心處理、二次感染　被蛇咬勿用口吸

============

同場加映：
【家居達人】專家分享床單小知識！ 點樣揀床單？清洗方法+次數？

============

早前有人喺行山時遭沙蚤咬傷，本來情況還好，但病情突然急轉直下，仲引發肝膽衰竭，實在令人擔憂！究竟夏天係咪應該要避免行山或戶外活動，減少被蚊蟲咬傷嘅機會呢？有毒理科專家估計，其實沙蚤並唔係具有劇毒嘅昆蟲，一般只會引起皮膚炎，將毒素殘留喺人體皮膚黏膜上，照理對身體唔會造成太大威脅。如果出現嚴重情況，有機會係因為當事人遭咬傷後，冇及時處理好傷口，其後又被其他細菌二次感染，最終細菌入血導致敗血症。

一般人被蚊、蟲、蜜蜂咬到會出現紅腫等情況屬正常反應，情況唔會太嚴重。不過，如果本身對某種蟲類或蜜蜂有過敏，咁就會好危險啦～譬如一個人對蜜蜂嘅毒素敏感，就算只係接觸到很微量嘅毒素，也有機會令身體出現過敏反應，出現氣道收縮，影響呼吸，可大可小㗎！

被咬後除咗紅腫反應，其他部位都同時有過敏徵狀，估計屬於系統反應，代表被咬者可能對某啲蟲或蜜蜂嘅毒素有過敏反應。如果只係輕微紅腫，建議可以使用抗組胺嘅藥膏，就可以消炎、消腫。

比起蚊叮蟲咬，大家可能會比較擔心被蛇咬，畢竟呢類情況唔係經常發生，一時之間可能唔知點處理好！有專家就指出，香港冇毒嘅蛇比有毒嘅多，遭蛇咬而導致嚴重中毒嘅個案其實並唔常見，可以話近十多年冇有關嘅死亡個案，所以大家唔使咁擔心。

不過萬一被蛇咬，千其唔好模仿電影中幫被咬者用口吸吮毒液，因為人嘅口腔有好多細菌，用嘴巴接觸傷口，有可能令傷口細菌感染，情況更為惡劣！另外，紥緊傷口的確有助減慢毒素進入循環系統，不過切忌用力加壓，或是用止血帶、毛巾繩子包紮綑綁，以免造成傷口處缺氧壞死，可能會令中毒情況惡化。

最佳處理方法係盡量令被咬者少啲郁動，然後盡快求醫，一般醫院都會有血清同解毒劑，有助緩解傷者情況。


Text/ Bee
Source/ unsplash