現年50歲嘅凍齡美女陳煒日前以事頭婆身份,為老公嘅醫美中心開幕做生招牌,一眾圈中好友譚俊彥 ,姚子羚,陳曉華,鄭則士,鮑起靜等都畀面到場支持,悉心打扮嘅煒哥更博到盡「中門大開」,非常性感!
同時擔任代言人嘅煒哥經驗豐富,不過為老公生意代言,佢就話唔係影完相做吓訪問就完事咁簡單,比平時仲要花更多心機幫手。煒哥表示冇份投資此公司,係老公陳國強有份名朋友合資。煒哥表示代言價理想:「唔係因為老公才收高啲,都係公司傾,我畀唔到折扣佢,惟有私下做多好多工作,為咗老公真係要做多啲宣傳,更加悉心保養自己,唔止一般拍完廣告同硬照就完成工作,佢賺到錢都要畀我使。」
同場加映: 12怪盜|Anson Lo拍動作戲太肉緊成受傷擔當 姜濤靠Stanley教戲不惜自嘲體重
煒哥透露性感裝束係設計師好友何國鉦特地為她於泰國選購空運來港,佢亦減磅以最佳狀態示人:「婚後真係懶咗,疏於保養,兩個月前開始改造自己,減咗15磅,希望畀到大家新鮮感」,老公仲喺活動後嚟接放工大曬恩愛。
陳曉華表示老闆娘煒哥會贊助變靚變fit:「見到煒哥咁靚咁fit,我都好想變到佢呢個身形,對我嚟講keep fit真係好難,我好鍾意食嘢又易水腫,自出世至今都未試過冇乜贅肉,希望可以瘦到煒哥咁零贅肉。」姚子羚大讚煒哥性感得來又高貴:「都去到一定年紀,確實需要保養一下,如果可以保養到煒哥一樣,真係正」。
圖片來源:Instagram