填詞人陳詠謙被提經典歌詞勃然大怒 無辜中地雷網民鬧小器：G點太多

唔少商業機構社交平台嘅小編都會去到名人嘅平台留言抽水刷下存，好多時都會得到唔錯嘅宣傳效果。日前某外賣平台嘅小編就抽水抽着火水，事源係小編去到陳詠謙嘅Post下用對方作品《別來無恙》一句歌詞「我現時自己肯做飯」留言：「今日自己做飯未？」，不料陳詠謙勃然大怒，斥外賣平台為咗刷like數可以罔顧佢嘅感受。

同場加映： 12怪盜｜Anson Lo拍動作戲太肉緊成受傷擔當 姜濤靠Stanley教戲不惜自嘲體重

陳詠謙就以長文回覆：「打算開threads睇吓呢一面嘅世界，半日唔夠，見到呢個留言真係既驚且喜。」、「原來除咗送外賣，重鍾意灑鹽巴。貴公司將個官方帳號交到你手上，估計係認可你嘅能力同品格，足以代表公司發言。唔通呢個就係戶戶送嘅企業精神？」、「為咗刷like數，可以罔顧一個人嘅感受；咁我估貴公司同樣可以為咗生意，罔顧車手/餐廳/食客嘅死活。」佢又表示係該外賣平台失望：「可能會覺得我小器？但善意惡意大家心知肚明。聽人講，threads係製造二元對立嘅平台。我上得嚟，預咗玩辯論。」之後該外賣平台亦已經刪除留言 。

冇耐之後預咗玩辯論嘅陳詠謙都刪文，不過已經被網民，大鬧佢小器：「真係敏感咗。」、「有冇咁小器。」、「無啦啦中地雷。」、「頁編死咗都唔知咩事。」、「feel唔到有惡意囉。」、「真係G點太多，點估到咁都中。」、「自己覺得係好，做咩要咁嬲。」

+8

+7

點擊圖片放大

陳詠謙2015年幫陳柏宇《別來無恙》填詞，當中一句「我現時自己肯做飯」引發軒然大波，更有網民惡搞成「瘋狂做飯版」。陳詠謙曾表示《別來無恙》包含佢私人感情經歷，未被惡搞前喺佢心中有個特殊地位，係同舊情人講自己已經改過，由大男人變得懂得重視身邊細節，關心身邊人，歌詞由不同畫面片段組成。陳詠謙表示同一個旋律佢會寫多句歌詞，而「我現時自己肯做飯呢」一句亦係「百挑十選」，當時佢指唔會為自己平反，只會不停檢討，但面對批評聲音都有唔開心，更有諗過轉行。

圖片來源：threads、Instagram