《中年好聲音2》亞軍譚輝智近日聯同商人爸爸譚握籌接受港台節目《舊日的足跡》訪問，譚爸爸被問及當上星爸的感受時表示，看見兒子唱歌時那份滿足感已很足夠。「做爸爸就是希望子女開心，又不是急於要他賺錢養家。」輝智強調父親對自己影響甚深，特別在待人接物方面。「爸爸經常教導我們要對別人禮讓，抱這態度待人，不論對發展友誼或事業皆有所得着。」
同場加映：父親節快樂｜ 鄭俊弘兒患天使綜合症最享受沖涼 感激囝囝：佢令我學識活在當下
外間指輝智在比賽中選唱《記憶棉》是故意讓賽，以免阻礙自己的生意和家庭，輝智回應說：「如果可以控制就勁喇，我估自己係三甲不入，得到亞軍已經超乎我想像。古淖文唱《Feeling Good》， 根本我唱咩都贏唔到，結果都係一樣。其實我本身想唱陳奕迅嘅《大個女》，唔係為比賽，純粹希望送畀個女留念，但可能成績會仲差。」
當上亞軍後，演出機會接踵而來，輝智的人氣亦越來越高，不過他坦言仍未習慣成為公眾人物，並指會時刻儆醒自己注重儀態。譚爸爸特別提點輝智：「要投身歌唱行業，必須要有實力，掌握箇中難度。要有心理準備，好事發生咗，亦有可能好快消失。」輝智認同要入行就要作最壞打算。「拉姑（狄波拉）都有畀意見我，特別係心理質素方面，佢教我點準備唱歌，點用聲。佢有好多秘方，但我唔公開得，人人知就唔係秘方啦。其實到而家我都唔知拉姑點解鍾意我，可能覺得我『傻傻地』。我好感激佢，佢知道我喉嚨痛，會畀我補品我，我感覺好幸福。（驚唔驚佢個仔謝霆鋒呷醋？）如果真嘅話，不如我哋見吓面，我都好想見到佢呀！」
入行後機會不斷，先是個人演唱會再有個人單曲推出，輝智笑言渴望與天王合作，「我係張學友粉絲，如果見到佢，我會暈。我係聽佢嘅歌成長，佢所有歌我都喜歡，每一首都聽好多次。仲有陳奕迅，我好喜歡佢後期嘅作品，好有深度。女歌手方面，我欣賞容祖兒，近排睇咗佢個演唱會，覺得佢好勁，聲底好厚、好勁。」
38歲的輝智自言人生中最滿意現在，「完成咗自己心願，下一個夢係有自己嘅代表作，即使路唔易行，幾十年後都會留低一、兩首歌，大家一聽就知道係我嘅歌，呢個係我目前唯一目標。」對於輝智的未來，譚爸爸忠告道：「做人要有目標，但唔好訂得太高，否則每日都會失望。要顧及健康，用樂觀態度去解決問題。身為公眾人物，擁有多咗，煩惱自然會多，根本冇可能完全解決，唯一係自己個心唔當係咩一回事，咁就已經解決咗。」
對於如何度過今年的父親節，譚爸爸笑指一切待子女安排。「佢哋最鍾意唱《真的愛你》，父親節禮物方面，輝智喺英國讀廣告設計，咁多年來佢都會親手造賀卡，阿哥、阿妹就會簽名寫幾句說話送畀我。我好珍惜，把佢哋一張一張咁包好，幾十年咩可以掉，唯有呢啲卡我唔捨得。而家我開始收藏七個孫兒送畀我嘅卡當做寶！」
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】卡樂B粟一燒熱浪香辣味！↓
↓ 粟一燒結合熱浪，香辣惹味！↓
《社群狂歡大激賞》！送hellolulu最新系列袋款🎁！
