市民獲派大埔新公屋月租$2800呻好貴 網民1原因批唔知足
近日有市民獲派大埔公屋，指房屋署派出大埔富蝶邨一個3至4人單位，每月租金$2800，但認為「好貴」，遂放上網與其他網民討論，帖文引來不少反彈。
獲派大埔公屋！月租$2800呻好貴被批評不知足
該市民透過社交平台群組發帖，稱早前收到房署通知獲派大埔富蝶邨一個3至4人單位，惟月租$2800仍呻價格昂貴，惹來不少網民都紛紛留言，認為對方「食米唔知價」，直言止述單位價格實屬公屋正常租金水平，遭批評「唔知足」、「公屋計唔算平，但亦唔算貴啦！好過出面租房住」、「好貴咪瞓天橋底唔洗錢囉」、「貴？知唔知而家出邊啲人捱緊幾錢租？」
另外都有同樣居住公屋的網民表示：「我3-4人都交$3071Ｎ（非富戶），廿年樓」、「平啦，我屋企4千幾正常租金」。有網民就表示公屋租金亦會視乎新舊樓，及單位大小等因素而定。因此不少人嘲諷樓主：「貴就唔好要，比其他人」、「真係好貴，我係你就唔要」、「支持你唔好要！去扎營唔洗錢咪仲抵」、「$2800新樓咁滯都嫌貴，瞓街啊洗錢喇」。
大埔「富蝶邨」是區內新建的大型公共屋邨，居民自3年前便陸續入伙，曾一度被人戲稱作「化蝶邨」。屋邨合共有9座樓宇，據房屋署資料，截至2024年12月31日，租住單位數目共有7,400個。
大埔富蝶邨租金水平參考
翻查2022年政府《釐定現有公共租住屋邨新建大廈的租金》資料文件，當時富蝶邨1至2人單位（14.25 平方米）月租約$1190；2至3人單位（21.73 平方米）月租約$1810；3至4人單位（30.60平方米、31.04 平方米）月租介乎$2550至$2580左右；4至5人單位（35.30 平方米、36.06 平方米）月租介乎$2940至$3000。房委會發言人當年曾表示，大埔富蝶邨逾59%單位的租金水平定於每月$2500以下，公屋租金已獲得大幅資助，當中已包括差餉、管理費及維修保養成本。
不過留意，從2025年1月起香港公屋加租10%，租戶每月增加$49至$572，平均$230，據政府資料約六成租戶上調的每月租金金額不多於$250；而約2%租戶上調的每月租金不多於$100。上調租金後，公屋平均租金佔公屋租戶平均家庭收入9.70%，因此上述的租金水平僅作參考。
當局亦指出，公屋申請人若未能負擔獲編配的新單位的租金，可要求改配租金較廉宜的翻新單位。如符合申請資格，市民亦可透過租金援助計劃，就舊大廈類別的單位申請援助。
資料及圖片來源：Facebook@香港突發事故報料區及討論區、房屋署
港生活人氣本地熱話
【🎁免費送】HIZERO 輕量級F300潔地機！
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
