易潔鑊｜化學博士K Kwong拆解易潔鑊9大迷思！需要開鑊嗎？幾耐要換？會釋出致癌物？

化學博士K Kwong在社交平台發文，解答市民對易潔鑊的常見誤解，即睇博士點講喇！

1. 易潔鑊需要開鑊嗎？

在解答問題之前，首先講講甚麼是開鑊。其實除了生鐵鑊和部分熟鐵鑊，大部分家用煮食鍋具都不需要開鑊。開鑊主要是為了去除鑊面的沙石、機油、再浸一浸油於鑊面，令鐵鑊不易黐底及生鏽。

由於我們最常使用的平底鑊、易潔鑊、煎鍋等都不是由生鐵鑄造、或者那些廚具為光滑的不銹鋼、又或者鑊面已有一層塗層，所以無需做開鑊步驟。只需要用洗潔精洗乾淨即可。

2. 為甚麼生鐵鑊要開鑊？

K Kwong解釋，因為生鐵鑊多數用沙造模具，再注入煮熔的生鐵水，最後冷卻成型，所以鑊面會有很多沙石，「更加大鑊嘅就係呢啲沙可能有啲蠟青有啲煤油以方便脫模，蠟青同加熱好多次嘅煤油都有可能致癌。」

3. 博士推薦Teflon (PTFE) 易潔鑊

博士提醒要小心使用易潔鑊，他表示「 Teflon 係好唔黐底，但係由於 Teflon 有可能致癌嘅 PFOA 、PFOS，好多人對易潔鑊都反感。」他解釋「PFOA、PFOS係幾百萬種 PFAS per/polyfluoroalkyl substance 之一，係出名嘅『』永久化合物』，最大嘅特性係唔黐底。」

至於被問到哪個牌子比較好，博士回覆指「其實冇分別，表面活化劑唔係用C8/PFOS/PFOA，就係用C3~C6，都會畀身體累積。」

4. 需要停止使用易潔鑊嗎？

K Kwong博士指自己會使用生鐵鑊及易潔鑊煮食，無需過份焦慮。需要注意的有3點，一、並非所有 PFAS 都證實會致癌，二、無刮花鑊面的塗層，三、溫度不超過260度，「其實佢放出嚟嘅 PFAS 未必多過你平時食外賣嗰啲紙包裝。」

5. 為什麼易潔鑊會有鋁？

K Kwong解釋「全部易潔鑊都係用鋁壓出嚟，因為平、可以好薄好輕身、又唔會生鏽。」唯獨有一件事要留意，就是煮具面層的Teflon有沒有損壞，如果有刮花或損毀，「就有可能放出鋁離子、或回收鋁内嘅其他有毒金屬離子例如鉻、鎘、鎳、銅、鉛。鋁離子會導致腦退化。」

6. 易潔鑊缺點

由於易潔鑊面層的 Teflon 是膠，如果加熱太快或冷卻太快，由於膨脹系數同鋁唔同，有機會使用期間剝落。「就算個鑊嘅外層已經有其他保護塗層保護住鋁，用得耐都會好易剝落」，所以並不耐用。

另一缺點就是易潔鑊不可直接在電磁爐上使用，「如果要用就要買嗰啲加咗一陣金屬(鋼)圈喺底層嘅易潔鑊。」

7. 勿用奇形怪狀的易潔鑊

K Kwong博士提醒，「市面上有好多標榜唔會黐底嘅 xx石、六角形紋嘅鋁鑊，標榜可以用鐵鑊鏟。K仔勸你千祈唔好用。因為佢只不過係喺 Teflon 塗層黐咗啲唔知乜石，用用下一樣會甩 Teflon。」尤其是注意奇形怪狀的煮具，如六角形紋鋁，「你用鐵鑊鏟好快就剷走咗突出嚟嗰啲膠，咁你個鑊啲鋁就好易走出嚟。」

8. PFOA free 就安全啲？

其實 PFOA 或 PFOS 是製造 Teflon 塗層的表面活化劑，博士強調「唔用呢兩隻嘢仲有好多 PFAS surfactant 可以用，呢啲嘢仲大鑊，因為冇人做過研究佢安唔安全。」

9. 要使用大牌子的產品

博士叮囑平價易潔鑊的鋁有可能是回收鋁，如果面頭層 Teflon 有損毀，就有可能放出鋁離子、或回收鋁内嘅其他有毒金屬離子例如鉻、鎘、鎳、銅、鉛。「如果你買嗰啲三幾十蚊深水埗鋁製易潔鑊，自己睇路！」

另外，為安全起見，即使沒有肉眼可見的刮花痕跡，亦建議約9個月就換新鑊。

10. 鐵鑊vs易潔鑊

K Kwong針對不同情況歸納出建議，如果只買一隻鑊讓工人使用，推介不銹鋼鑊；如果只買一隻鍋自用，並打算烹調美食，選生鐵鑊或鑄鐵鑊；如果以方便角度出發，又能接受頻繁換新鑊，選Teflon易潔鑊。

▼原帖文▼

點擊圖片放大

來源：K Kwong