【做隻出色的馬仔】20大開會扮工守則

每日返工，其中一樣你最唔想做嘅嘢一定係開會，每次都Recap 、Recap再Recap上次講過嘅嘢，之後亂吹一堆廢嘅Idea出嚟，對於小編呢啲小薯仔咪可以嘥下時間，但係如果畀人見到你個樣唔耐煩就死得啦，今日就教你點樣喺開會嘅時候扮個勤力員工！

1.遲到入會議室，再加句：「Sorry，頭先有啲嘢跟緊！」

2.主動幫腦細斟茶遞水，好似有做嘢咁。

3.坐到老遠，無咁易畀人發現你瞓著。

4.掃電話還掃電話，都要扮下嘢望下個PowerPoint。

5.望下個PowerPoint之餘，都要同腦細有少少眼神交流，點下頭。

6.拎定簿加筆扮Jot Note，其實一隻字都冇寫，費事畀人以為你掛住玩電話

7.將個電話攝喺入本簿度玩嘛。

8.拎多一大個File，入面成堆紙，好似準備咗好多嘢咁。

9.Present嘅時候有理無理係咁喺個白板度圈，仲要幾廿種顏色，好似好多重點咁。

10.無人打畀你，不過中間突然衝出去會議室，返嚟然後話：「Sorry，頭先個客有啲Urgent嘢搵我。」

11.當啲大粒佬講完嘢，你就即刻加句：「係呀，我都係咁諗！」，效果就好似會考Oral講句：「I agree with you！」

12.有啲細粒嘢講完嘢，你就爭住幫佢解釋：「阿邊個邊個嘅意思其實係……」

13.人哋Present緊嘅時候，無啦啦彈一句：「可唔可以返返上一個Slide，有啲嘢唔係好明？」等人知道你好似聽緊！

14.唔知人哋講咩，但見到人哋都係吹水，你就講句：「有冇啲數據Support你個Point？」

15.當人哋話：「有25％嘅人點點點」，你就回一句：「即係有1/4人點點點」，等人覺得你分析力好強！

16.明明唔知頭唔知路，但當其他人Free Flow緊嘅時候，你爆一句：「不如退一步，其實我哋想要啲乜先？」顯得你好似好冷靜！

17.有人提啲Idea，腦細個樣又好似唔Buy嘅時候，你就要質疑：「呢條橋係咪真係Work？」

18.個會完嘅時候，扮晒關心公司，搶住問：「下次個會幾時開？」

19.個會完嘅時候，即刻分付啲同事要做啲乜乜乜，大大聲畀腦細知你好緊張，扮有Follow Up。

20.之後即刻閃人，但又要一路扮同客講電話，其實就趕收工。