羅家英大男人宣言踢爆十九次求婚真相 敢言揭汪明荃冇權反對放棄電療決定

羅家英大男人本色 拒絕治療未徵詢汪明荃

四度患癌的家英哥，宣布放棄電療與化療，事前有沒有徵詢阿姐意見？家英哥一派大男人本色：「阿姐冇俾意見我，不過我諗佢係同意嘅，佢都係出嫁從夫，丈夫話事，何況條命係我嘅，佢點話到事呢？」家英哥補充，決定前曾與阿姐「講過吓」，但阿姐看似沒有專心去聽，「而家報道出嚟更加清楚，都冇乜點再特別傾！」

家英哥自爆愛「按pat pat」紓緩腰痛

查小欣打趣追問，家英哥與阿姐平時都是靠報道知道對方消息？例如當年家英哥被影到去揼骨？家英哥說：「佢（阿姐）贊成我去揼骨㗎，佢仲幫我book埋房！而家少咗去，以前好燥，腰骨好赤好攰，但揼骨都冇特別好到，後來買咗嗰啲按摩器，我就瞓喺度、晾住對腳，將佢（按摩器）放落自己個pat pat度，原來條腰攰就係因為pat pat嗰條筋，你將佢鬆咗，我行好多路，以前行一個鐘頭要抖，但而家唔使！」

羅家英坦言與汪明荃常為小事吵架

家英哥從不言休，近日正籌備劇本《柳如是》，他說：「我覺得我嘅年紀好適合做錢謙益，因為佢成七十歲，就搵咗柳如是（明末清初名妓）做老婆，（娶個後生靚女嘅老婆，會唔會都係你嘅心願？）呢個係每個男人嘅心願！（你唔怕返屋企要跪玻璃？）佢鬧我亂講嘢囉，慣咗！（你覺唔覺得你改變咗阿姐？ ）佢改變咗我肯同佢講道理。以前我唔鍾意同人哋辯論，唔鍾意解釋、唔嗌交，大家嬲爆爆唔出聲，而家唔係啦，坐喺度講啦！（通常邊個拗贏？）睇吓邊個有道理，好多濕濕碎碎嘅嘢要拗，佢（阿姐）係一個好堅強、好硬頸，自己認為啱嘅嘢就去做，但佢認為啱嘅嘢，未必係啱嘅，講道理咋嘛，佢認為啱聽就聽，唔啱聽就算！」

大彈汪明荃粵劇演出「跌咗分」

家英哥直言，跟阿姐最常爭吵的話題，正是他最執着的粵劇演出：「佢（阿姐）鍾意演電視劇、唱歌、跳舞，但佢唔係好鍾意演粵劇，佢俾嘅時間冇其他咁多，我話佢，但督促唔到，亦都教佢唔到，佢唔係好想我教，我嫌佢唔好，可以好啲！」對阿姐的粵劇演出，家英哥有什麼評價？他勇者無懼：「跌咗分！八七年、八八年，佢同我做《穆桂英大破洪洲》，如果佢嗰時係九十分，而家最多得返七十分！（你小心啲喎！）唔使小心，佢係鬧我，話我唔讚佢，但我唔係鍾意讚人嘅人，我真係好衰，我最多話幾好、幾好，如果我讚你嘅時候，就係我嬉皮笑臉：『你冇得頂，去到天咁高！』但呢啲讚係假嘅！」

羅家英笑稱報道誇大求婚次數被誇大

查小欣憶述到羅家吃飯，阿姐吩咐工人炮製豉油雞，知道家英哥幾點落機，會預先夾定靚雞留給老公，家英哥笑言阿姐「敬老」之餘，都不忘讚返老婆：「阿姐係一個比較好心腸嘅人，佢能夠同我拍拖，我有啲感恩！（你點追求佢呢？）都唔係點追求，大家互相碰埋一齊，（但你求咗十九次婚先搞掂喎！）邊有咁多次呀！做新聞啫，不如話佢求我結婚，我唔應承十九次！」

點擊圖片放大

羅家英四度患癌拒絕治療惹揣測

.查小欣開設全新YouTube 頻道「紅查館」，打頭陣的重量級嘉賓，請來大家非常關心的羅家英，早前家英哥證實第四度患癌，他卻表明不再接受化療或電療，因而惹來「放棄治療」的消極揣測，家英哥澄清，自己並沒有「放棄治療」：「這次復發是前列腺癌，我並不是不治療，而是用另一種治療方法；我之前切除了前列腺，檢驗報告沒事，誰知有些東西（壞細胞）潛伏在深處未曾成型，現在成型有很多粒，切不到。」

羅家英受訪澄清真正原因

家英哥續稱：「醫生說只得一個方法，就是打女性荷爾蒙針，遏止它繼續發展，但大概八年之後就無法遏止，這個時候就需要化療、電療，我今年七十九歲，八年後已八十多歲，垂垂老矣，所以我決定到時都不會再化療、電療，除非在這段期間發明新科技，有藥物可以控制病情，否則我不如盡情玩樂、飲飲食食！」

羅家英自爆打針後性慾全失

自注射女性賀爾蒙針，家英哥坦言感覺自己身體較前虛弱、容易疲累，也不喜歡說話與接受訪問，家英哥快人快語：「自從切除前列腺後，對於『色』字，個人定咗、淡咗！（坦白說，即是性慾淡了？）冇呀，仲要打埋女性荷爾蒙，更加冇！（會不習慣嗎？ ）慣咗，已經四、五年！」

羅家英為治癌幾乎花光積蓄

相對今日的豁達，回想零四年首次發現患肝癌，家英哥直言心情沉重、十分害怕，要靠唸心經平復心情；十年後再驗出肝臟有事，家英哥顯得較為鎮定，他說：「最重要是有沒有錢？我沒有買保險，也從來不信保險，我以前就知道，我一定要有積蓄！第一次（做手術）用掉，第二次又再用些……（積蓄因治癌花光？）還未花光，仍有一些，還有一件事，我沒有叫老婆（汪明荃）幫我！（阿姐說要幫呢？）她亦沒有說要幫，她知道我有（積蓄），如果她願意幫我，我都好樂意！」

羅家英與癌共存之道

第三次因抽血驗出前列腺癌，家英哥已相當淡定：「抽了八粒瘜肉，其中四粒有癌，我與呂爵安去台灣拍攝旅遊節目，一個月後回來才做手術，醫生說前列腺癌進展得好慢，可以在兩年後才接受治療。」今日四度患癌，家英哥已完全學懂共處之道：「我跟癌症說：『你在我身體裏生存，我走了，你都要走！你別以為你好威，大家相安無事，你不要搞我、我不要搞你，別在這裏放炸彈！』」