金式森林丨三屆視帝郭晉安激罕分享演戲心得秘訣：要識得點樣去令到自己迷失！

文: 鄭惠文

6小時前

無綫台慶劇《金式森林》，昨晚（14日）一集講到，方仰天（郭晉安飾）車禍昏迷、再加上之前爆發的假珠寶危機，方氏股價急劇下瀉，吼住方氏主席位多時的鄺偉樑（徐榮飾）、乘機聯同家族辦公室主理人高深（羅子溢飾）大肆向方氏搞破壞。令人震撼的是，高深曾是方家大少奶鄺善荃（何依婷飾）前度，最終因女方臨結婚前移情方學禮（何廣沛飾）被派綠帽…

三屆視帝郭晉安激罕分享演戲心得

而貴為三屆視帝的安仔，對於演戲確實相當有心，早前他在個人社交網平台便開心share演戲心得，除笑言演戲最重要秘訣是「迷失自己」外，更大談《忠奸人》角色的高難度之處。安仔：「我會覺得有啲人對演戲係特別有天份嘅，佢裏面有一個機制，好快就會識得點樣去令到自己迷失，然後去容納咗個角色喺個腦入面。」

要識得點樣去令到自己迷失！

郭晉仔又指：「如果你唔能夠迷走你自己（意指迷失）嘅話，你永遠都會覺得好尷尬，你會覺得：『咦？點解我要做（演）埋啲咁嘅嘢？』」、「我嘗試去解釋吖，因為你個自我形象太強，咁嘅時候的確係好難投入做戲…當自我形象唔係太強，咁我哋就可以容納到被叫去做／表演一啲嘢，而嗰樣嘢唔係我哋慣常做嘅，亦都可能唔係『我』嚟嘅。」

點擊圖片放大

郭晉仔親揭演《忠奸人》難在「好多限制」

並表示：「當（知道個角色）唔係我嘅時候，個信心就會走出嚟（即係有信心），因為嗰個唔係我嚟吖嘛，我對自己冇信心，但你要我去做（演）一個人嘅時候，我嗰個信心就會出番嚟。」、「我特別有印象嘅就係《忠奸人》，佢最難嘅地方喺邊度呢，佢有好多限制，限制咗佢要做一個好人，全世界都覺得佢係一個超好嘅人，但係佢裏面有好多嘅諗法，佢每做一件事都係有機心。每次我演嘅時候，都要不停去做一啲違背我意願嘅嘢，但係本身我自己都產生一個分析能力，去主導我自己點樣去演，然後我就將我所體會到人生嘅嘢，擺返喺個角色入面。」