港人掟彩虹四邊見紅邊慘被判唔中！網民怒喊夠報海關！內行揭「中大獎視差潛規則」

文: 梁雪盈

16小時前

【掟彩虹 / 視差效應VAR / Threads熱話】去遊戲中心「掟彩虹」本是開心事，但往往就因為判獎而引起爭議。近日再有港人發文痛訴於啟德 TAITO Station 玩掟彩虹時，銀幣看似完美落在紅心大獎範圍，豈料副店長現場一眼判定「唔中」，事後向客服投訴亦維持原判！事件引爆全港網民怒火，質疑「四邊有紅邊都唔中」，揚言叫樓主報海關！隨著事件持續發酵，亦引來店方回應「視差效應」，而多位曾任職遊樂場的內行人更出言揭開「中大獎潛規則」！

銀幣四邊見紅邊港人掟中大獎遭冷淡判定「唔中」

有網民在社交平台 Threads 上發文，記錄自己在啟德天璽天 TAITO Station 玩掟彩虹的離奇經歷。樓主指當時銀幣落枱後，從現場的角度看，四邊完全沒有碰到黑線，周邊更能清晰看到紅邊，顯然落在紅心大獎範圍內。

從樓主補充的現場相片可見，銀幣停定在紅心圓圈內，從上方或斜角拍攝均能看到銀幣四周被紅邊包圍。然而，店員通知副店長前來檢視後，對方僅看了一眼便拋下一句「唔中」並返回員工室。樓主要求近距離垂直核實被拒，店員僅代為用手機拍照，隨後便將硬幣掃走。樓主事後聯絡 CS(客服) 投訴，對方稱「已翻查相關影像，硬幣右邊擲界，維持原判」，交涉一星期無果，讓樓主大感沮喪並表示不會再幫襯。

▼樓主全文▼

點擊圖片放大

網民爆怒：呢張圖夠報海關！兼指相機視角問題

相片曝光後，大批網民看過樓主拍攝的高清近照後紛紛為其抱不平，留言區火藥味濃，不少網民都力撐樓主簡直是「教科書式正中」，「四邊都有紅色底，睇都唔掂線喎」、「呢張圖基本上可以報海關，唔係奬唔奬品問題，而係公道」。有人更搬出相機視角邏輯論，「如果個銀仔有掂到黑邊，無論點影都唔會影到一個紅圈圍住個銀仔。所以個銀仔根本上都冇掂到黑邊，舖頭超過分」！

除此之外，大部分網民都力批店方行為似乎刻意為難顧客，「真係老土，獎品又唔係黃金」、「大獎係咪樓上嘅天璽天」、「其實鍾意去嘅人都係想買情緒價值，唔係想比人激親」、「一句講晒，喺香港玩掟彩虹根本係智商稅」！不過都有部分網民保持中立，反質疑樓主「用左塊2.5mm厚膠板還原一下，另外張VAR要返轉先同其他相啱方向，所以大家唔好打斜影過去，話要報海關」。

▼網民留言▼

+27

+26

點擊圖片放大

內行揭「中大獎潛規則」！前員工爆料：VAR 角度可以就？

事件亦吸引不少曾任職各大遊戲機中心或主題樂園的前員工現身爆料，揭露掟彩虹大獎背後的種種秘辛。他們一致指出大獎通常需管理層確認審批，就算用 VAR 都可以「就到個角度係擲界」，而且直言「佢哋其中一個心情唔好即刻冇得中，推嗰個只係負責傳達佢哋嘅訊息」、「員工心情唔好會嚴啲係真事」。更有前員工爆料，「有人有爭議會放 Cam，但其實個 Cam 係傾斜 15～30 度左右」，引來傾斜視角疑雲。另外有些情況是硬幣落枱第一下不是正中，但被別人的幣撞到再推入正中央，這種情況都是不會給獎的。

▼網民留言▼

點擊圖片放大

店方官方回應：存在「視差」效應！硬幣邊緣已觸碰黑線

面對熱烈討論，TAITO STATION 回覆傳媒查詢時指出，分店彩虹池均設有專業鏡頭放大驗證設備，經高清俯瞰畫面及放大截圖確認，該硬幣邊緣已明確觸碰或壓於黑線之上。而針對樓主所講的「現場唔俾我哋行近共同核實」，店方就回覆因依據安全指引，彩虹台內部不開放予顧客進入，但工作人員樂意協助使用顧客手機從正上方進行垂直拍攝。