中年失業｜53歲測量師裸辭2年無人請！積蓄見底愁供樓 網民盤點5招中高齡自救
【中年失業 / 裸辭 / 測量師 / 搵工 / 年齡歧視 / 供樓】現時本港羌就業環境充滿挑戰，中年失業成為不少打工仔的噩夢。近日一名53歲、持有專業牌照的測量師發文大呻，兩年前裸辭後至今仍未成功搵工，面對積蓄見底及供樓壓力，一家三口陷入焦慮。本文為你拆解中高齡求職的殘酷現實與最新失業率數據，並整合網民及獵頭公司的5大過渡轉行建議，助失業人士走出困局。
有專業牌照都搵唔到工？測量師裸辭後失業2年自白
一名中年測量師近日於Facebook發文，道出自己求職兩年仍然一無所獲的心路歷程，「好心淡，今年53歲男，建築業有牌測量師，多年承建商、業主、顧問公司經驗，二年前因公司關係毅然裸辭」。帖文隨即引來大批網民留言，亦揭示香港職場的殘酷現實。
樓主自稱擁有建築業測量師牌，多年來累積承建商、業主及顧問公司的豐富經驗，兩年前因公司變動而主動裸辭。萬萬沒想到，之後的求職路竟然如此艱難：
不斷投寄求職信、託同事朋友介紹、委託獵頭公司協助，數十次申請大部分石沉大海
家中有太太、兒子及一層樓要供，經過兩年，儲蓄不斷減少，心開始慌
最令樓主心淡的一句：「宜家公司見到五字頭根本已經不作考慮」
政府統計數據：失業率及失業人數一年變化紀錄
根據政府統計處最新公布，2026年6月至8月經季節性調整的失業率為3.8%，較5月至7月的3.7%上升0.1個百分點；就業不足率亦由1.7%升至1.9%。
統計期間 | 失業率（經季節性調整） | 就業不足率 | 失業人數（不經季節性調整） |
|---|---|---|---|
2025年1月至3月 | 3.2% | 1.1% | 122,800人 |
2025年3月至5月 | 3.5% | 1.4% | 135,800人 |
2025年4月至6月 | 3.5% | 1.4% | 136,200人 |
2025年5月至7月 | 3.7% | 1.4% | 145,000人 |
2025年6月至8月 | 3.7% | 1.6% | 151,000人 |
2025年7月至9月 | 3.9% | 1.6% | 155,600人 |
2025年10月至12月 | 3.8% | 1.7% | 138,200人 |
2025年11月至2026年1月 | 3.9% | 1.7% | 138,400人 |
2025年12月至2026年2月 | 3.8% | 1.7% | 134,700人 |
2026年1月至3月 | 3.7% | 1.6% | 136,600人 |
2026年2月至4月 | 3.7% | 1.5% | 139,200人 |
2026年3月至5月 | 3.7% | 1.5% | 141,100人 |
2026年4月至6月 | 3.7% | 1.6% | 139,700人 |
2026年5月至7月 | 3.7% | 1.7% | 145,700人 |
2026年6月至8月 | 3.8% | 1.9% | 153,000人 |
資料來源：香港政府統計處歷次公布的《失業及就業不足統計數字》，失業率反映經調整後的趨勢變化，失業人數為未調整的實際規模，兩者升跌步伐未必完全同步，屬現時統計現象。
中高齡搵工難真係咁誇張？即睇「年齡歧視」數據
網民留言直指「香港係一個有職場年齡歧視嘅地方，45歲以上搵工都非常艱難」，有關講法並非空口講白話。根據平等機會委員會過往發表的《職場年齡歧視的探索性研究》，超過三分之一（35%）在職人士表示過去5年曾因年齡而在職場受到不同形式歧視；調查亦顯示，78%受訪者認為60歲或以上人士最容易受年齡歧視，67%認為50至59歲人士同樣高危。
另一項由慈善機構進行的調查亦發現，約六成46歲至75歲的受訪中年人士，表示難以遇到合適職位或遭遇年齡歧視，更有受訪者指出「申請最少20份工作才能獲得一次面試機會」。以下為職場年齡歧視相關數據一覽：
35%在職人士過去5年曾經歷職場年齡歧視
78%受訪者認為60歲或以上人士最容易受歧視
67%受訪者認為50至59歲人士同樣高危
約六成中年受訪者反映難找合適職位或遇歧視
自稱獵頭公司親身分享：超過50k大把人選擇
一位自稱從事獵頭工作15年的網民留言，原來對於月薪要求較高的求職者而言，招聘週期漫長已經是業界常態：「超過50k，大把人選擇，1個Job好多僱主左揀右揀，recruitment cycle 3-6 or 1年我都見過⋯正常off market一年，好多都唔好揀得，你兩年基本上大部分都唔好揀你。或反映樓主已經裸辭兩年、遲遲未找到相關工作，並非個人能力問題，而是整個招聘生態同市場結構性問題疊加所致。他更直言：「你計劃吓轉行，因為太多人失業。」
網民過渡方案5大建議整合：先求生存、再談理想
面對嚴峻的求職環境，不少同路人網民都分享了過渡期心得，主要圍繞「先穩住收入，再慢慢尋找合適機會」方向而行：
建議方向 | 具體做法 |
|---|---|
1. 轉做基層職位過渡 | 超市理貨員、茶餐廳樓面、看更、保安等，先支付部分生活開支 |
2. 善用現有專業資歷 | 自行開設一人測量顧問公司，利用舊有客戶網絡及牌照接生意 |
3. 報讀相關進修課程 | 例如報讀HKMA物管課程，轉攻物業管理工程經理職位 |
4. 考取駕駛相關牌照 | 駕駛的士、送外賣，惟外賣員牌照現時申請需等候半年以上 |
5. 尋找兼職教學機會 | 入學校做導師，或做兼職顧問，維持部分本行參與 |
有網民更以自身經歷鼓勵樓主：「小弟而家都50，五年前裸辭，休息半年之後創業，而家有10個員工。重要嘅係要不斷學習。」另一位則提醒：「而家呢個環境，你兩年前冇離開，公司都可能辭退你，其實冇乜分別。」
建造業持續輸入外地勞工 網民認為受影響
值得留意的是，有網民留言提到「駕駛車輛及小巴已經見到外勞⋯到大型商場的管理員又是外勞」。翻查資料，發展局於2023年7月開始推行「建造業輸入勞工計劃」，容許建造業僱主申請輸入指定工種的勞工，反映建造業相關行業確實存在輸入外勞的政策背景。
網民完整留言一次睇：
不如你試下其他工種做住去揾，起碼吾係淨咬儲蓄，我都有舊同事5x，依家番住馬會果d做住先...parttime做住黎一直再揾。
我50幾，吾算揾得多疫情前都有5皮野一個月之後疫情裁員而家做緊保安2皮野一個月...C兄加油。
老友，我都50幾。先放低心態同身段，要每朝同自己講： 我得既我要堅持！乜嘢都做，即使Part time都好。唔好沉，因為一沉衰嘅自然會嚟。
加油！我都一樣係五十歲人做過設計，上一間公司做咗18年半，今年四月被裁員之後心都非常之焦慮，算好彩隔咗兩三個月後搵到份新工，當然人工冇以前咁好，雖然做咗兩個月但都未適應公司文化但係總算有份工做住先，加油畀心機
香港係一個有職場年齡歧視嘅地方，45歲以上搵工都非常艱難，再加上經濟差，有外勞同埋工作而入內地，再加埋AI基本上呢個年紀冇人介紹想搵返本行都難。
馬死落地行，大丈夫能屈能伸，咩工都好，即使茶記樓面超市執貨都做住先，起碼有收入同有份記托，之後慢慢騎牛搵馬。
小弟而家都50 ，五年前裸辭，休息半年之後創業，而家有10個員工。重要嘅係要不斷學習，放假唔代表休息，放工後嘅時間，代表咗你之後嘅人生。
咁就大鑊啦，專業人士到50歲就冇嘢撈，揸車揸小巴已經見到外勞，麥當勞沖咖啡嗰兩位又係外勞，去到大型商場嘅管理員又係外勞，咁即係要慳啲使隨時冇咗份工。
唔好諗以前喇，世界一早變曬，放下身段，快手轉過第二行，從底做起，唔係到時清潔都冇得你撈呀。
好多人好境果陣搵到錢，而家唔肯接受低人工，有時就係要向現實低頭，馬死落地行，咩都做住先喇，再等都係冇意思，你唔好諗住仲可以搵返以前咁高，而家成個大環境都好差，加油。
可以去見物管工程經理同報讀HKMA物管課程，以你資歷再進修唔難。加油。
你哋都叫做專業呀月薪，我哋呢啲做地盤經常畀人拖兩三個月人工，我哋都係見日做日㗎咋好天曬落雨淋。
我做飲食業幾十年，60歲，已失業一年多，打算轉行去做清潔！
而家咩都有可能，所以要不斷裝備自己，即係就算突然失業，都可以立即開工既裝備。
可能無得堅持本行，或者可以搵part time做住先，例如入學校導師。
個人認為搵工暫時唔好搵自己有牌工作，可以搵其他如RSS，人工比以前低唔緊要，最重要有機會。加油。
資料及圖片來源：Facebook@裁員炒人消息關注組、政府統計處、平等機會委員會研究、發展局公開資料、Canva示意圖
港生活社會話題
↓【限時搶⚡】超級市場HK$50電子現金券↓
↓無門檻！即買即用零消費限制↓
【賺U Fun💰】秋季家居博覽2026
雲集家居設計、智能家居、傢俬及生活用品！
U GO 本週好去處
