全九龍最平$3000套房曝光!近日有港人分享油麻地一個月租$3,000的套房租盤,自稱是「全九龍最平嘅套房」,惟單位內床位竟緊貼座廁及浴室,狹窄程度令人咋舌。照片曝光後隨即引起網民熱議,有人怒轟業主無良,亦有人笑言單位環境「慘過坐監」,留言相當爆笑。
油麻地$3000套房曝光 床貼廁所兼浴室
有港人在Facebook群組「香港即時突發事件討論區」刊登放租帖文,表示單位位於油麻地,月租$3,000,並形容是「全九龍最平嘅套房」。樓主坦言單位空間較小,而且「一眼睇晒」,但強調價格相當便宜,「細係細左啲,但係超級平」。
從帖文照片可見,單位推門後幾乎已將全屋格局盡收眼底,床位與右側企缸幾乎零距離,旁邊就是座廁、熱水爐及牆身花灑頭。由於現時未有安裝浴簾,洗澡時隨時令床鋪濺濕,樓主亦表示「業主會裝番個浴簾」。至於床身亦相當狹窄,躺下後恐怕連轉身亦十分吃力,床板下方則設有兩個開放式儲物空間,整體空間十分有限。
網民怒轟業主無良 直言「情願瞓街」
租盤曝光後,不少網民對單位設計及租金表示難以接受,紛紛留言批評:「會唔會離譜咗啲,太空艙2500都話有張床」、「我情願瞓街,不如佢比返$3000蚊我」,更有人怒斥:「人渣垃圾業主,無人性,點可以住得人㗎?仲收三千元,等天收。」
亦有網民質疑業主是否有考慮租客的實際生活需要,直言:「想問d業主個良心痛唔痛」、「咁都整得出嚟,完全冇人性。」至於浴室與床位緊貼的設計,亦惹來衛生及使用上的疑慮,有網民擔心如廁所堵塞,「啲屎谷晒出嚟,應該點部署」;亦有人指出即使加裝浴簾,洗澡時地面仍容易積水,「沖涼咪成張床濕晒」。
網民留言
網民呻慘過坐監 笑言監房空間更大
除了批評單位環境惡劣,不少網民更認為居住條件甚至不如監房,紛紛留言「坐監除左無得自由出街外,好過呢到10倍」、「坐監直頭免費,仲有人工」、「仲慘過坐監」、「咁睇坐監真係唯一岀路」。亦有人笑言「坐監個倉大過佢」、「嘩,監房都大過佢」,更以「體驗坐監生活」形容單位環境。
網民留言
網民發揮創意開玩笑 笑稱如廁沖涼一步到位
不過,亦有網民以幽默方式調侃單位的特殊間隔,將床位與浴室、座廁近在咫尺的設計形容為「方便至極」。有人笑稱:「可以一路屙屎一路沖涼」,亦有人表示:「方便,有夜尿一起身就屙到」、「一步就到,燈都唔洗開」,甚至戲言「唔使起床,打側個身就得」。
來源:Facebook@香港即時突發事件討論區








