（老實）我鍾意同女朋友傾電話多過whatsapp…

文：藍橘子

同女朋友小豆兩個人，前世都唔知係咪啞，一見面就總有講不完嘅話題，雞啄唔斷，亦可能因為傾計太多，女朋友太熟悉我講嘢語氣，或者個腦諗緊乜，有時會好似唱雙簧咁，同時間講咗某句嘢出黎。
　
有時講到第二句，佢已經估到我想講乜，繼而向我反白眼，或者笑到彎晒身。
　
我本身係一個星爺迷，對話中成日都夾雜電影對白，有次我話：
「七孔流血還七孔流血，死還死，兩回事黎千祈唔好混淆！」
之後我考佢呢句對白喺邊度黎，佢諗都唔諗就答：「周星馳囉…唔通梁朝偉咩！」
「……」
「咁你無得同我架FC鬥啊鬥啊鬥啊鬥啊鬥啊…呢？」
「周星馳！」
「錯，係陳冠希。」
「…」
　
呢種對話上嘅默契，絕對唔能夠由whatsapp可以培養出黎。所以同女朋友拍拖到而家，都好鍾意傾電話，除非真係好忙，如果唔係都好少去用Whatsapp溝通，就算係一句好短嘅問題：「今晚食飯喺邊度等？」我都會打電話畀女朋友，傾兩句計，當係一個減壓運動。
　
我公司棟樓電話接收好差，一定要行落樓下先可以講到電話，而公司樓下最多嘅…就係圍住個垃圾桶煲煙提神嘅打工仔。人地叼住支煙，我就拎住個電話，一樣都有提神功用，仲有益健康添～
　
此外，睇達哥打機睇得太多，有時腦海會出現佢把聲。而每次睇見女朋友whatsapp訊息，望住啲字就會自然諗到佢講呢句嘢嘅語氣，直頭有聲有畫面，就連表情符號都會變做佢個樣，喺腦海浮現出黎。
　
有次放工搭緊巴士，佢突然間用錄音Whatsapp我，平時我哋有乜事都盡量傾電話，好少用錄音，所以我就即刻聽吓咩事，點知…佢話…
　
「我哋玩個遊戲，我扮一種動物叫，你估，然後就輪到你扮！」
　
我都未拒絕佢，佢就已經send咗段豬叫畀我。
不過我又係衰，我好雀躍咁答咗：「豬！」
點知…就中咗女朋友嘅計！！
　
「啱喇！到你扮～」就係呢一句，呢個遊戲就永無止境咁開始咗，whatsapp變成動物園對話，狗同貓講嘢，羊又同牛對話…
「你咁鍾意藍鯨，不如你扮佢叫啦！」
「藍鯨點叫啊話時話…」
「係喎我都唔知～」
　
呢個遊戲，就喺我聽到身後有好大聲「滋」一聲，有人忍唔住笑咗出黎。我先意識到…自己喺巴士上層有幾投入去扮動物叫…
　
當時我腦海突然彈咗一個畫面，喺youtube上見到我喺巴士不斷扮動物叫，標題係『為氹港女男朋友扮狗』遊戲只好暫停。
我打電話去同女朋友講，叫佢小心唔好咁大聲，佢話：「吓我一早返到屋企，乜你仲喺巴士咩…哈哈哈白痴仔！」
　
「……」所以話呢，如果同女朋友傾電話，就唔會發生呢個誤會。
　
女朋友經常會創作一個白痴遊戲，好似『喺街扮唔識相遇』、『如果我係你個妹』、『試吓男女身分交換』，但我又總係好投入咁去玩，因為佢係我女朋友，佢唔會笑我，同佢玩我都好開心。（有人想知點玩再講）
　
女朋友就係一種令你撞邪嘅生物。
　

（老老實實，我知鯨魚識唱歌，但有冇人知藍鯨點叫？） 

本篇圖文獲作者藍橘子授權刊登，未經准許，請勿轉載！

藍橘子Facebook：https://www.facebook.com/BlueGodZi/ 

作者其他文章：

>>右手係我女朋友 

>>（真人真事）千祈唔好畀女友著和服！因為佢會覺得自己好靚！ 

>>（真人真事）千祈唔好帶女友去環影影城！因為佢會當自己係小朋友！ 

>>對個男仔講「傻瓜」，殺傷力一定大過叫ＢＢ或豬豬