點解我搞親乜爛Gag，女朋友都會笑

文：藍橘子

話說，我廢話真係好多，廢話當中，爛gag佔一半…
有次同女朋友行街，見到一間未食過，連openrice都未有食評嘅新餐廳，討論緊搏唔搏，入去試食一次好呢。
　
「做人嘅嘢，一係搏！一係唔搏！…唔拖唔水咁妳知唔知變咩啊？」我問。
「變咩？」
「變『微博』啊！！」
「……」女朋友連表情少少變化都無。
「唔好笑咩…？」
「哈哈哈哈哈哈哈哈哈！」
　
幾秒之後，女朋友先get到我講乜，然後笑到飆晒眼水。
　
「喂妳又太誇張啦，又未至於好笑到咁…」
「笑到我個肚好痛啊…」
　
見到女朋友笑到塊面紅晒好似就黎窒息死咁，等我仲以為自己好幽默。但當我返到公司同同事開會時講…
　
「一係搏！一係唔搏！…唔拖唔水會變咩啊？微博啊！哈哈哈哈！」
　
成個會議室靜晒…
唔係，唔單止靜，係連一個表情反應都無。
「喂藍橙仔，西伯利亞人都凍死啊你個gag爛到…」
「…」
　
一股終極挫敗感從心底裡油然而生，我喊住咁將呢件事話畀女朋友聽。
佢話：「係啊，你個gag真係好爛，但你個無奈樣好好笑！」
「唔係喎，你上次笑到扯晒蝦咁，應該都唔算好爛掛？妳老實答我！」
「唔～一般般啦…」
「咩叫一般般啫，一係好笑！一係唔好笑！一般般就係…微笑啊！哈哈哈哈！」我攪盡腦汁去駁返個gag，希望可以引到女朋友笑。
　
「……」女朋友個樣直頭結咗冰！
　
「哈哈哈！好爛啊！但出自你口唔知點解好好笑。」我唔知咁樣係算安慰我，定係恥笑我。
　
事後我發現，無論我講乜女朋友都會笑，當一大班人食飯，我扔咗個爛gag出黎，淨係得坐我隔離嘅女朋友笑到喀喀聲，其他人就陷入咗無盡嘅沉思。
　
於是，有一日我問女朋友：
「其實呢，妳係咪聽乜笑話都笑？」
「唔係啊，我淨係覺得你講先好笑咋。」
「真係？咁妳覺得我係咪一條硬漢？」
「吓？點為之硬漢？」
「一係硬一係軟，唔通係『微軟』咩！哈哈哈！」
「…」女朋友一臉不解。
「微軟喎！Microsoft喎！」
女朋友好冷酷咁哦咗一聲，然後打咗個冷震，不愧係冷面笑匠。
　
各位巴打，如果你經常搞爛gag，
又遇到一個你講乜都會笑嘅女朋友，請好好珍惜。
因為呢個世界無人會明白你，死咗條心！
　
各位絲打，搵男朋友，
除咗個package要好，隻眼夠靚，最重要係識得氹妳笑。

本篇圖文獲作者藍橘子授權刊登，未經准許，請勿轉載！

藍橘子Facebook：https://www.facebook.com/BlueGodZi/

作者其他文章：

>>（男人恥辱）【女朋友完全唔驚我去偷食】

>>（老實）我鍾意同女朋友傾電話多過whatsapp…

>>同女朋友鬧交唔緊要，唔好隔夜就得喇！

>>右手係我女朋友

>>（真人真事）千祈唔好畀女友著和服！因為佢會覺得自己好靚！