老闆一句星期一9點前將文件放喺我枱面難聽過粗口

文：抒文

Happy Friday，終於進入收工的倒數時間。

「講樣恐怖野你聽啦……」Amy煞有介事地說。
「我嚇大喎！」阿成輕吐舌頭。
「聽講之前我哋team個marketing plan有問題，阿head個建議比人ban左，個proposal應該要再做過……」Amy把話說完。
阿成發出震撼性聲音「啊！！！！！！！！！！」

放工，對每個打工仔黎講係一日既解脫，唔少同事都希望愈早走愈好，如果本身放6點，最好早15分鐘就可以執下野，休息下；可惜事與願違，每次見到放工在望，總會在5點半左右突然「空降」一堆文件，然後你又只能「望門輕嘆」。

話返轉頭，阿成收到Amy既消息，都知今次大件事，已經做好最壞打算。
「喂，阿珍，多年來我有句說話想向你說，其實，我愛你……」還未等電話掛掉，阿head已經出現在面前。

「阿成，唔理你哋任何代價都好，星期一9點前將文件放喺我枱面！」說罷把文件摔在枱上。

呢句說話既震撼性絕對唔細。首先，要重新做marketing plan，時間一定唔短，要2日內重做困難好大，另外，今日係星期五，你叫我哋不惜任何代價星期一9點前交，即係暗示我哋犧牲星期六日去完成，邊有人會為份工去犧牲咁浪漫架？我聽過！我真係聽過！戰爭電影咪會囉！

「我命令你哋不惜任何代價搶得對面軍事重鎮！」將軍總是威風凜凜，不過下屬通常之後都斷手斷腳唔好彩無埋個頭姐。

雖然個口咁講，但身為一個無骨氣既打工仔，我哋最後當然都係照做，而且順利星期一9點前將文件放喺佢枱面。

點知，一直等到下午2點，都見唔到阿head返公司，後來先知道原來佢一早攞左一日time off，因為星期日晚飲酒怕宿醉起唔到身。

明明星期二先返，點解唔比多一日時間我哋？至少我哋唔會白白犧牲左休息時間。唉……老闆一句星期一9點前將文件放喺我枱面，真係難聽過粗口。

本篇圖文獲作者抒文授權刊登，未經准許，請勿轉載！

抒文 Facebook：https://www.facebook.com/sharefeeling2015/ 

作者的其他文章：

>> 我們其實為寂寞而戀愛
>> 你份糧包唔包埋陪笑？
>> 新同事，你唔識用FAX 機可唔可以直接話唔識呢？