聽到方力申Stephy分手，我好似又失多次戀咁……
文：B612
有時一班Friend坐埋一齊，無聊起上嚟，我哋會玩估歌仔：唱一句歌詞然後鬥快講出究竟佢係連詩雅嘅邊一首歌，難度係五粒星。然後係十級挑戰：試閘述出葉念琛系列某套《乜乜愛》嘅人物同情節。
嘩，真係玩死人咩。
就算大家點樣屌葉念琛嘅電影情節套套一樣，不外乎第三者嗌交分手復合第三者嗌交無限復活，最後，你又咪係入場睇。一套又一套，《獨家試愛》、《十分愛》、《我的最愛》……其實買飛入場，只係為咗睇方力申同Stephy。
當初拍《獨家試愛》，傳出佢哋兩個撻著，唔理佢點否認，大家都一口咬定佢哋拍拖。之後呢對螢幕情侶都備受香港人愛戴。
方力申同Stephy嘅形象一直好貼地，佢哋嗌交講過嘅嘢，我哋一樣講過。唔知係咪因為成日凝住，總係覺得佢哋喺唔同階段推出嘅合唱歌，都同自己拍拖嘅經歷好配合。
細個暗戀人，曖昧過後無結果，失親戀就一定狂Loop「好心好報」、「好好戀愛」。大個咗試過認真愛一個人，聽「十分愛」先知，愛過太深原來身體會疑問，再沒法可適應別人……然後遇上另一個我好鍾意嘅人，佢係拍咗七年拖分手同我一齊，每次聽到佢播「七年」呢首歌我都好心翳，唔知佢係咪因為七年之癢先會同咗我一齊……
總之每次聽到佢兩個嘅歌，嗰種失戀嘅心情就會即刻被激活。佢哋拍拖十周年而特別推出嘅電影《紀念日》，我都有入場睇。除咗Stephy成熟咗個Look真係好～～索之外，我睇完淨係得一個感想：如果佢哋分過幾百萬次手都仲可以喺返埋一齊，點解我唔得。
OK，而家我知道，原來係連方力申同Stephy都唔得。
當大家一路睇一路鬧，你兩個分嚟分去又一齊返，煩唔煩啲呀。而聽到佢哋真係分手嘅時候，原來點都係會一絲傷感。十年感情，都唔代表可以走到最後。
完了吧？如無意外……
唔講咁多住，因為我要去Loop返晒佢哋所有失戀歌，將我呢世人嘅戀再重新失一次……
本篇圖文獲作者B612授權刊登，未經准許，請勿轉載！
B612 Facebook：https://www.facebook.com/b612lpp/
作者其他文章：
港生活人氣本地熱話
↓【限時搶⚡】原箱高鈣梳打餅↓
↓黑芝麻 / 芥末味｜口感香脆、高鈣健康↓
【社群送禮🌸】送您麒麟一番搾啤酒及「和風櫻花禮品套裝」！
↓簡單一步登記贏禮物！↓
