區區有髀髀！全港邪惡炸雞髀小店地圖(Part 1)

嚟Causeway Bay，梗係食返隻「Causeway髀」。丹麥餅店隻髀，係銅鑼灣人都食過。

丹麥嘅炸髀，唔算大，勝在入味，嗰層油，養大幾多香港兒女。利園同SOGO班蛇王，三點三集結丹麥，十七蚊，但求買返個天真。小編個fd，聖保祿睇完大夫一行出黎又話要食炸脾，丹麥唔惡咁邊個惡？

小食店企足超過40年，加咗十幾次租都做得住，你唔好話，留得住真係有佢原因。

肶肶大小：★★★
香脆程度：★★★
入唔入味：★★★★
係咪即炸：Oh yes！

丹麥餅店更多推介及地址：

http://hk.ulifestyle.com.hk/spot/detail.html?id=ABdGDlowBwpZEANu 

尖沙咀分店：

http://hk.ulifestyle.com.hk/spot/detail.html?id=ABdGDVowBwJZEANt 

灣仔港式快餐店買少見少，樂景係其中一間，堂食座位唔多，主要做外賣。

除咗丹麥，樂景係唔少脾迷聖地，生炸嘅髀肶熱辣辣跟碟上，即叫即炸，保證脆皮，快快脆趁熱食，唔好太喉擒。 

髀髀大小：★★★★
香脆程度：★★★★
入唔入味：★★★
係咪即炸：Oh yes！

樂景快餐店地址：

http://hk.ulifestyle.com.hk/spot/detail.html?id=ABdGDloyBwxZFgNs 

炸靚肶唔淨係得快餐店有，呢間旺角舊冰室嘅炸髀一樣好出名。

中國冰室畀人懷舊感覺，文青仔check-in勝地。咁classic，好大原因係佢裝修用馬賽克風格，仲有閣樓，貪得意一定上樓梯坐卡位。電影迷一定識佢，《迷離夜》、《PTU》、《性工作者十日談》、《旺角揸Fit人》、《新不了情》等電影都喺度拍，點解？因為電影人最鍾意落冰室茶記度橋，度度下用埋個私竇嚟取景。

生炸髀一樣即叫即炸，印象深刻在一咬開脆皮之後，裡面啲雞油應聲喊晒出嚟，咩話減肥？你第一日出黎行？ 

肶肶大小：★★★★
香脆程度：★★★★
入唔入味：★★★
係咪即炸：Oh yes！

中國冰室地址：

http://hk.ulifestyle.com.hk/spot/detail.html?id=ABdGD1o0Bw5ZFQNs 

食完旺角隻肶，經已入夜，我坐上了旺角開往大埔的紅VAN，繼續搵髀髀。

有大埔居民話，未食過三多，你根本唔算食過炸髀，三多喺大埔區真係好響朵。

串住炸脾嗰支竹籤，係三多炸肶嘅記認，可選擇加唔加辣粉，夠晒惹味。縱橫咁多間炸髀店，三多最為脆口！連埋蜜糖爆珠珍珠奶茶，真係好Juicy。（套餐$43）

留意，三多只開夜晚直至深夜，夜媽媽先黎炸肶，心地唔好呀你，我鍾意呀！！而三多正對住林村河，係《紅VAN》最重要嘅取景地，哈哈哈哈夜媽媽望住條河幾過癮。

髀髀大小：★★★★
香脆程度：★★★★★
入唔入味：★★★★
係咪即炸：Oh yes！

三多小食地址及營業時間：

http://hk.ulifestyle.com.hk/spot/detail.html?id=ABdGDVo3Bw5ZFANq 

相關周圍遊：坐《紅VAN》 走入電影中的大埔 

http://hk.ulifestyle.com.hk/tour/detail.html?id=ABBGD1ozBwpZHgNu 

新界嘅炸肶代表，仲有食口福。呢度嘅炸髀一個字，大！好Q大！

雖然一隻賣成$24，但佢真係好大隻，無返咁上下手力唔好諗住拎上手，用刀叉食把啦。食口福嘅髀髀重點係雞肉較其他店嫩滑，難怪曾獲高登巴打力捧。 

呢間餐廳畀人話過唔衛生，暗訪當日未見異常。 

批批大小：★★★★★
香脆程度：★★★
入唔入味：★★★
係咪即炸：Oh yes！

食口福地址：

http://hk.ulifestyle.com.hk/spot/detail.html?id=ABdGDlo7BwhZEQNp