或者喺唔少人嘅印象當中，鯉魚門只係一個出名嘅「海鮮市場」.... 你聽我講啦，鯉魚門唔係你想像中咁簡單架，佢係仲有精緻Cafe、阿婆愛心茶果、心願樹同靚日落睇。先生小姐，下面介紹返條鯉魚門入門路線畀你，埋嚟睇埋嚟玩。
第 1 站 西灣河碼頭 8分鐘到三家村
西灣河碼頭 其實嚟鯉魚門，除咗由油塘站搭車或漫步15分鐘，仲可以搭船嘅。第一站就帶你望望呢個西灣河小碼頭先。呢度有兩班來往觀塘同鯉魚門嘅船，每半小時一班，航程8分鐘左右，幾方便。
溫馨提示：
1)因面臨停辦危機，2015年年頭渡輪票價由$6加到$9。話雖如此，都仍然10蚊有找，慢活系人士一搭無妨。
2)如果你好餓，上船前可以喺太安樓掃埋街先！太安樓美食推介：
西灣河碼頭位置：
點擊圖片放大
第 2 站 Jim's cafe 色彩繽紛「厚多士 」
如果唔食海鮮，嚟到鯉魚門係咪要食草？放心，呢度有間cafe，唔錯架！Jim's cafe為4位80後男仔經營，店內走歐陸風格，裝潢充滿異國風情。食物方面，主打甜品，首創馬卡龍多士盒：外表100分，但士多啤梨味口啤最好。 飲品都有gimmick，其中一杯叫「天使藍」，但真身係「橙味疏打」，好神秘喔。
溫馨提示：呢度有埋擲鏢機，手痕嘅可以$5玩番舖！
Jim's Cafe前往方法及介紹：
第 3 站 媽子靚茶果 周日賣九款靚果
客家茶果可能你食過，但一次過食九款味道咁多選擇，相信大家都好少有機會試！不妨幫襯呢位周婆婆，茶果以手造兼炭火蒸成，用心又足料。除咗傳統嘅「雞屎藤」味，仲有自創嘅艾草、花生、芝麻三合一味，婆婆你係得嘅。
溫馨提示：
1)「媽子靚茶果」只開星期日，有心人記得睇住呀～睇住時間呀～
2)其實售賣地點附近有棵靚樹同童年時代跳飛機，無得食都可以影張相，幾有FEEL。
媽子靚茶果前往方法及介紹：
點擊圖片放大
第 4 站 心願樹 求姻緣最靈
大埔有棵街知巷聞嘅「許願樹」，咁你又有無拜訪過鯉魚門嘅「心願樹」呢？不過此樹不同彼樹，因為後者係無得拋寶牒架，但大家都可以喺樹前許個願，影張靚相。點許願？隨心啦，最緊要誠心。聽講，求姻緣最靈驗，小編求咗喇，靈唔靈遲啲話你知～
溫馨提示：大家乖，話明呢棵係「心願樹」，將個願望放喺「心」度就得架啦，記得唔好破壞棵樹呢。
心願樹前往方法及介紹：
點擊圖片放大
第 5 站 鯉魚門石灘 影燈塔歎維港日落
最後一站，嚟到心願樹對出嘅石灘，呢度望海、釣魚、影日落都一流。聽聞情侶們最鍾意走上燈塔度山盟海誓，扮埋「You jump，I jump」都仲得啦，hehe！
溫馨提示：
若果在下鍾意睇日落，不妨睇埋另一篇日落周圍遊呀。
鯉魚門石灘前往方法及介紹：
點擊圖片放大
後記：
１）若然你想「鳩嗚」，其實鯉魚門都有得買手信：豬肉乾、雞仔餅、蛋卷，基本嘢都有。
２）鯉魚門仲有個隱世石礦場，多數pre-wedding去影靚相。但篇幅所限，有興趣嘅大家自己去發掘下啦！
活動資訊
- 地點
」，
App內睇文同睇片可隨時捕捉U Fun彩蛋，
換領現金券及禮品！
【登記送🎁】L'OCCITANE 3款臻緻節日倒數日曆🎄！
↓一次帶走24件護膚、身體／頭髮護理及香水產品↓
↓【限時搶⚡】卡樂B粟一燒熱浪香辣味！↓
↓ 粟一燒結合熱浪，香辣惹味！↓
