熱愛優質生活

香港的西岸 屯門小欖沿海BBQ、跳蚤、Cafe遊

 

屯門黃金海岸、小欖一段路,係本地渡假好去處,淨係對住機場同青馬大橋條海岸線都已經夠殺。

唔好以為呢度得間酒店同沙灘,原來呢條路仲收埋唔少好嘢,隱蔽靚Cafe、跳蚤市集、海鮮天堂,日頭玩到日落食埋飯都仲得。

第 1 站 屯門站口租單車 兜風必備

想玩屯門小欖,最好梗係有自己車去,如果唔想坐巴士,不如租架單車慢慢玩啦。

呢間單車舖就係最就腳,屯門西鐵站行三分鐘就到,租一日單車$70,留低身份證號碼同電話笠巴,夜晚七半前還車就好。

屯門單車庫地址及營業時間:

http://hk.ulifestyle.com.hk/spot/detail.html?id=ABdGDVo3Bw1ZEQNi 

第 2 站 三聖邨食海鮮 揀隻靚嘅去加工

由市中心出發,踩單車廿分鐘、搭輕鐵8分鐘,就會嚟到三聖邨。

好多人話入流浮山食海鮮,其實屯門三聖都好出名,既方便又好味。呢度分開海鮮市場同海鮮酒家,慣常做法係先去市場揀啱心水嘅魚蝦蟹,再拎去酒家加工,街坊推介興記、容龍,收費合理手勢亦唔錯。

三聖邨海鮮批發及酒家位址:

http://hk.ulifestyle.com.hk/spot/detail.html?id=ABdGD1ozBwlZFANu 

第 3 站 黃金海岸 發現特色良心Cafe

提起黃金海岸,大家諗到酒店同沙灘。係嘅,黃金泳灘、咖啡灣、青山灣面向西面大嶼山,日落確係好睇。

不過,好多人都唔知原來呢度有間靚Cafe,就喺國際慈善組織「國際十字路會(Crossroads Foundation)」裡面。Cafe叫做「Silk Road Cafe」,以絲綢之路為概念,加入維吾爾哈薩克人家居的設計元素,仲有室外花園雅座,無得彈。最重要係呢度賣嘅所有食品都係公平質易產品,由本地社企製造,價錢亦好合理,一件Muffin($10)加一大杯Latte($25),$35平過一般Cafe啦,仲可以用行動支持公平貿易添。不過,如果你鍾意,可以畀多啲貼士以作鼓勵!

(唔係話因為佢係Fair Trade所以要支持,而係呢間Cafe確係平靚正!) 

國際十字路會Silk Road Cafe地址:

http://hk.ulifestyle.com.hk/spot/detail.html?id=ABdGD1ozBwJZFwNu 

第 4 站 小欖唔止燒烤 潛入秘密跳蚤市場

潮流興市集,呢個周末跳蚤市場,雖不及錦上路嗰個出名,但規模都幾大。

除咗入口處有隻馬棟咗喺度唔知咩事,呢個跳蚤市場都正正常常,感覺優閒,有店舖播住80年代廣東歌,賣二手貨,感覺猶如回到過去。市集裡面區外人唔多,小欖居民通常周末入嚟買吓日用品,唔好expect有好多嶄新精品,呢度主打生活所需及懷舊味道。

離開跳蚤市場一路向深井荃灣方向,有小欖燒烤樂園,面積寬敞,好多人都知道兼去過。 

樂安排小欖跳蚤市場地址及前往方法:

http://hk.ulifestyle.com.hk/spot/detail.html?id=ABdGD1ozBwJZFwNp 

第 5 站 屯門轉車站 青山公路超靚海岸線

小欖海岸線係吹海風、睇日落不二之選,自從屯門巴士轉車站落成之後更加方便,一落車就到!

每逢周末,有好多釣魚發燒友嚟到,亦有唔少跑步友,文青仔嚟思考人生,眺望有青馬大橋,仰望見飛機升降,一直等到日落,留個影,再去食飯,周末就係咁relaxing。 

青山公路荃灣至大欖段玩法:

http://hk.ulifestyle.com.hk/spot/detail.html?id=ABdGDVowBw5ZFgNv 

內容評分
評語