熱愛優質生活

紅磡新玩法 發掘Buffet新場、芝士熱狗、5000呎大笪地

你唔知咩?而家出街,唔興行銅鑼灣、旺角嗰啲架喇,留番畀遊客啦。以往大家都無乜留意舊區,直到越嚟越多小本生意轉攻小社區,大家嘅興趣亦開始流入呢啲區域,咪舊區當新街行囉,反正新舊交融不失為一個好gimmick,係咪咁講呀?

最近有唔少新鮮事物注入紅磡黃埔,我哋一齊睇睇。 

 

第 1 站 英雄地大笪地 狂人聚腳新點

開幕約1個月嘅「英雄地大笪地工作室」,由90後衝勁男Andrew開設。本身為Henna(印度身體彩繪)藝術家兼導師,Andrew想建立一個平台畀有目標、有幹勁嘅同志們,一齊努力實踐理想,就決定租呢個地方。

佔地5,000呎,空間闊落,英雄地表面睇係一間Cafe,但Andrew無打算將成個空間塞滿檯櫈,專登留返一個空間,搞各類活動,音樂live event、地攤、Workshop等都有得搞,有idea就有得傾,做乜都得,嗌破喉嚨都無人理你,最緊要大家自由發揮,Enjoy

英雄地大笪地:

http://hk.ulifestyle.com.hk/spot/detail.html?id=ABdGDVo3BwNZEANt

第 2 站 大環山公園、紅磡海旁 漫步好地方

英雄地對開就係海濱長廊,梗係要行一行。由大環山公園到紅磡碼頭嘅海濱,對面海望住港島東區走廊,左面有啟德碼頭,漫步沿途走到紅磡海逸酒店外面,湖水藍欄杆及街燈柱都幾適合影相。

大環山公園:

http://hk.ulifestyle.com.hk/spot/detail.html?id=ABdGDVo3BwNZEANi

第 3 站 Hotel SAV 紅磡Buffet新場

Hotel Sav (逸.酒店)一樓嘅餐廳Palette係區內一個Buffet、afternoon tea新場,最近有唔少blogger都去試食。

Buffet 有即開生蠔、波士頓龍蝦、松葉蟹腳、串燒等座陣,星期日至四$488,旺日$518,價錢一般抵啦,食型格環境都OK,個場走時尚感,環境燈光運用得幾好,紅紫色燈光唔太OVER。反觀二人Afternoon tea 只係$288,酒店價嚟講可以一試。 

Hotel Sav:

http://hk.ulifestyle.com.hk/spot/detail.html?id=ABdGDVo3BwNZEANj 

第 4 站 ICONIC HOTDOG 熱溶芝士熱狗

網上捧到上天花板嘅熱狗店,熱溶芝士熱狗,係咪咁堅?今次嚟個偷偷摸摸暗訪測試。

ICONIC HOTDOG 職員會問你揀咩腸、要咩Topping、揀醬料、跟唔跟餐.... 嗌一個包,衍生出好多問題,但係暗訪當日,雖然正值lunch time,姐姐都好有耐性教育低能嘅小編點餐步驟,好窩心。我嗌咗個紐倫腸($25)加熱溶芝士(+$10)加松露滑蛋(+$10)配黑松露沙律醬(+$3)跟餐(+$12)有笑哈哈薯餅同汽水,top吓top吓六草嘢,老老實實唔平喎。

不過,當個熱狗一到手,芝士份量真係唔留手,熱狗拎上手,芝士係咁漏。小編堂食之時,一啖咬落去芝斷絲連,出面街有條仔望住我食,睇到眼都唔眨,似乎睇中咗我條熱狗,算你識貨。整體嚟講呢件事好Heavy,我鍾意。

ICONIC HOTDOG:

http://hk.ulifestyle.com.hk/spot/detail.html?id=ABdGDVo3BwlZHgNp 

第 5 站 寶石戲院 平平地睇場戲

寶石戲院超過40年歷史,2012年經過翻新但仍保留舊式情懷,門口仲有一部測體重機,電影放映機,好吸睛。

最practical 梗係要講呢度睇戲平好多,而家出面睇套2D都成$70至$80,呢度2D收$50,3D都只係$55,係咪抵呀?

寶石戲院:

http://hk.ulifestyle.com.hk/spot/detail.html?id=ABdGDVo3BwxZFwNj 

內容評分
評語