另類文青推介！小清新家品雜貨乜都齊哂

「古道具公園」本來只係網絡商店，主要售賣從法國同奧地利帶番嚟嘅精美古物，並以1900至1950年嘅農莊風格傢俱為主。不過，等到7月尾，佢終於都實體化啦！

位於觀塘、有成2200呎嘅「古道具公園」店內劃分咗唔同區域，如「戶外花園」及「海明威的飯廳」，方便客人逛得更舒適；而店長亦會好樂意同你分享每件古物背後嘅獨特故事，再配合埋整個充滿住法式田園味道嘅環境，實在令人好似坐咗時光機咁，回到古代法國，好有feel呀！

溫馨提示：呢度有法國特色甜點修女泡芙提供架（好靚樣!），仲有公平易貿薑味曲奇同凍茶等。不過食品供應不定期更新，所以確實詳情請向店長查詢啦。 

嚟到旺角，第一感覺係多人、多車、多廢氣，對嗎？如果你認同的話，咁位於登打士街附近嘅一扇門應該會成為你心目中「鬧市嘅清泉」！

因為一入到去，環境開揚好舒服，幾有台灣雜誌「小日子」嘅感覺（而佢牆上的確掛咗幾本小日子）。 小店雖然唔大，大約只有8個座位，但感覺愜意，坐幾耐都唔會趕你走；而且有特色飲品提供（食品則可自攜），仲有來自港台品牌寄賣嘅手作同衣服等，最啱同情人知己嚟傾心事，HEA一個下晝。 

溫馨提示1：呢度仲可以寫紙仔點歌聽架，文青們睇嚟會點過女神陳綺貞啦？！

溫馨提示2：「早起的鳥兒有蟲吃」，想坐能望著街景的高椅景記得早點來霸靚位啦～（小編經驗是下午2點來，然後一HEA就HEA到6點，爽！哈哈） 

一扇門詳細介紹及前往方法:

http://hk.ulifestyle.com.hk/spot/detail.html?id=ABdGDVo3BwJZHgNt 

自從赤柱間「藍屋」突然變成「黃屋」後，小編對藍色建築物特別有親切感，而且呢間店仲要開喺大埔林村的隱世角落，直情係「萬綠叢中一點藍」！  

店主話呢間係「生活起居小店」，賣嘅主要係店主由英意法各地精選搜羅番嚟嘅廚房用具，款款都設計精美簡約，令人愛不釋手。食品方面，每日供應都唔同，keep住大家嘅新鮮感嘛。有興趣可以睇下下面嘅UBlog介紹，真係睇到相都好想食，嗚呀！

溫韾提示：小店只在周末營業，而且Google Map個地址錯架，想去嘅可以參考店主手繪嘅地圖呢（見圖一）

A Beautiful Store詳細介紹及前往方法：

http://hk.ulifestyle.com.hk/spot/detail.html?id=ABdGDVo3BwJZFQNj 

UBlog博客分享：

《太好吃的Banoffee Pie！：a Beautiful store》 

必先講明，「戀物」絕對唔係貶義。每個人唔多唔少都有戀物情結，差在狂熱程度各有不同。

嚟到貘記，你可能會分唔清，呢度到底係雜貨店定咖啡店？其實兩者皆是，事因店主並無刻意為貘記定型。店主從世界各地收羅咗唔少雜貨小物。布袋、杯杯碟碟、餐具、紙扇……每件物品的來源，店主都可以如數家珍般地一一道來。

枱上仲放有人手鉤織嘅餐墊，再有可愛小擺設陪食。甜品一嚟到，我嘅視線竟然唔係畀食物所吸引！其實蛋糕很好味，但杯碟嘅紋飾實在係太靚喇！哎呀，唔小心暴露咗自己嘅嗜好添……

溫馨提示：通常會於周二及周六對外開放，時會舉行各式展覽及活動。文青記得留意。

貘記詳細介紹及前往方法:

http://hk.ulifestyle.com.hk/spot/detail.html?id=ABdGDVo3Bw1ZFgNr