瞓覺都有學問！專家教你點樣瞓得好 夠凍先瞓得好？枕頭應揀軟定硬？床褥散熱好重要！

Stephanie與先生Rick共同創辦Hush Home及Little Hushies，佢本身係一個獲專業認可資格嘅睡眠專家兼健康顧問，今次就由佢為大家解答關於睡眠嘅一切疑問！

Q6.溫度及燈光會影響睡眠質素嗎？
答︰因為人體準備瞓覺同瞓緊覺嗰陣係我哋核心溫度最低嘅時間，你需要喺凍嘅環境先可以瞓得好。建議大家可將冷氣較凍少少以及選擇有散熱功能的床褥枕頭被舖，令你瞓覺時唔會一路出汗，熱氣唔會焗喺被竇入面，因為咁樣就會影響睡眠質素。有一樣嘢可能覺得有少少矛盾嘅，就係瞓覺前應沖熱水涼，呢個大家都知道因為熱水涼好舒服，所以會瞓得好啲，即係好似浸浴咁。的確係會令大家放鬆啲，但其實比較科學嘅解釋係沖熱水涼身體會覺得暖，實際核心溫度降低，熱水會令人體內的熱氣從皮膚散出。

燈光方面，建議使用完全遮光嘅窗簾或眼罩。如果有啲人好驚黑嘅話可開一個小夜燈，因為好驚就會影響心情。瞓覺之前一定要係最放鬆嘅狀態，先至唔會用太多時間去入睡。另有小貼士就係睡前一小時將燈光教暗，因為有啲人可能會開到好光或者睇電視，所以腦部其實接收緊好多唔同訊息。雖然你想瞓覺，但可能仲會覺得係天光。所以睡前教暗燈光、盡量唔好睇電話、訓練腦部︰「我而家要瞓覺喇！」

Q7.嗅覺及聽覺會影響睡眠質素嗎？
答︰香薰最主要可以做到兩樣嘢︰放鬆身心、 睡眠質素有所提升、睡得深。因為入睡前應該要係最放鬆嘅狀態，有啲研究都有指出原來瞓覺前同瞓覺嗰刻聞緊某啲香薰味，如薰衣草會有助睡眠。

聽覺方面，可以聽歌，但當然要搵返適當嘅音樂，如比較溫和、節奏比較慢的。同樣有研究指出原來瞓覺前聽音樂會令入睡時間快啲，亦可以提升睡眠質素。

Q8.點揀床褥？
答︰床褥要有承托力、適合自己（瞓得舒服）、適合居住環境氣候。瞓覺時人體會生產熱力，所以一定要揀散熱透氣力高、有承托力、唔會太硬但有少許柔軟度，咁先對人體脊椎最健康。

Q9.點揀枕頭？
答︰1.自己鍾意︰自己瞓得舒唔舒服，因為每個人嘅喜好都有少少唔同，所以都要揀啱例如鍾意柔軟定更加有承托力嘅枕頭。
2.多數瞓覺姿勢︰呢個對揀枕頭都好有影響，即係唔同枕頭可以迎合到唔同姿勢？其實最主要係睇返高度。
3.身高︰比較高嘅男士就要用返高啲嘅枕頭，嬌小嘅女仔就要用矮啲。但另外一定要睇返你多數係側睡定仰睡。

4.透氣物料︰如果唔想半夜起身瞓得好熱，透氣程度好緊要。
5.放塵蟎物料/防過敏物料︰有啲人呼吸道會比較敏感，所以最好就揀呢類物料，可以防止敏感情況發生，以免影響睡眠。

Text/Yuen
Photo/Ken
場地提供/Hush Home

================
【瞓覺都有學問！上集】
瞓覺都有學問！專家教你點樣瞓得好 一定要瞓夠8個鐘？半夜札醒發夢無問題、食褪黑素呃個腦？