百年腐乳老字號廖孖記早前因被食安中心驗出菌含量超標，喊冤後更作出結業決定，成為全城關注焦點。第四代傳人廖晃業（Jay）今日（22日）接受電台節目時承認白腐乳並非由廖孖記所製造，指約30年前因應排污條例更新，遂從港人經營的內地廠購入白腐乳，再進行加工調味，認為仍屬於「香港出產」。敘福樓主席兼行政總裁、稻苗飲食專業學會榮譽會長黃傑龍更開腔評論事件。
廖孖記承認30年前外購白腐乳加工 強調從無隱暪來源地
廖晃業在接受商台節目《在晴朗的一天出發》時表示，廖孖記早於30年前因排污條例更新，要求生產豆腐有濃酸水，需要淡化成清水才能排除，惟廖孖記廠房未能符合相關要求，因而決定從其他供應商外購白腐乳再加工，只著重做後期生產。他又指出該供應商雖是內地廠房，但實際上是香港人，為從前的香港行家。
至於被問及有否隱暪白腐乳的來源地，他強調從來沒有隱暪，指前來廖孖記的客人均可看見生產工序「冇得呃」，除了白腐乳外，甚多產品均是自家廠房生產。不過，他承認消費者對於廖孖記全程在香港生產或有誤會，與認知出現落差，但強調仍然是「香港出產」，
第四代傳人指結業與食安中心無關 稱已盡力對得住爺爺祖業
廖晃業最後表示，結業決定與食安中心無關，但亦不否認食安事件是導致結業的「最後一根稻草」。對於網上的批評，他則表示「對得住爺爺、對得住廖孖記祖業」，並向顧客致歉。
黃傑龍開腔評論事件 質疑廖孖記生意「誠信」
黃傑龍今早（22日）聽完廖孖記的訪問後透過個人Facebook發長文，開腔評論事件，指「食安嗰部份放埋一邊唔講住，對於做生意講誠信呢一點有嘢想講」。
黃指出：「如果30年前某一個生產腐乳重要過程已經變咗唔係自己做，咁之後你啲宣傳、訪問、點可以繼續講返真嘅一樣現場做？ 如果因為某啲社會嘅原因或者法例嘅原因某一種工序已經唔可以再喺香港造，只能夠坦誠同消費者講，係唔係繼續買係消費者嘅決定。」
黃又認為，所有商業活動都應以「誠信」行先，又以ifc挽肉與米作例子，指跟足日本社長要求，店舖每日均用日本牛肉新鮮製造漢堡牛肉，「既然係公開講咗承諾咗，就當然係一直會咁做，如果有一天我哋變成喺深圳搵一啲現成嘅漢堡扒嚟賣，為咗控制成本，我都一定事先會同大家講，絕對冇可能詐詐諦諦靜靜雞換咗唔話俾人聽繼續收人咁多錢」。
憶述17年前父親教誨 謹記「價真貨實」價值
黃傑龍同時於文內，憶述17年前接手敘福樓時因為立志為酒樓改革，打算試用市場上的中央工場現成點心及包裝上湯，豈料頭一次遭到父親嚴厲喝斥：「試吓都唔准，行入嚟門口都唔准，俾人見到佢行入嚟人哋都以為我哋用呢啲咁嘅嘢！」事件令黃非常深刻，從此亦謹記教誨，強調做生意產品著重「價真貨實」的價值觀。對於上述情況，他表示，「當然，我亦都冇咁蠢會走去咁樣做，我爸爸17年前已經好認真咁教咗我做生意講誠信呢個終極道理」。
▼全文▼
不少網民留言批評，認為廖孖記「樣樣野都唔搵方法解決，淨係話過唔到時代個關。呃咗三十年淨係識推到一乾二淨話自己無錯」、「就係想貪方便，賺到盡」、「不論做人定係做生意，誠信最緊要」；但都有網民表示，從訪問中聽得出廖孖記的無奈，認為對方但求想息事寧人，「希望佢一家振作」。
▼網民留言▼
▼百年老店廖孖記腐乳拉閘結業▼
廖孖記事件自今年6月底，被食安中心從西營盤一個零售點抽取第一樽腐乳樣本化驗，證含13萬蠟樣芽孢桿菌超標屬「不滿意」後開始發酵，並陸續驗出不合格樣本，其後廖孖記主動接受電視台節目訪問並喊冤。至本月中位於油麻地的廖孖記地舖拉閘「結業」。據報道，同區代理指出，廖孖記所在的油麻地閩街甚少舖位作買賣，預計若廖孖記自用舖放租市值租金可達5萬元。
資料及圖片來源：HKET、Facebook@黃傑龍 Simon - 窮富翁 好人好事
」，
App內睇文同睇片可隨時捕捉U Fun彩蛋，
換領現金券及禮品！
【登記送🎁】L'OCCITANE 3款臻緻節日倒數日曆🎄！
↓一次帶走24件護膚、身體／頭髮護理及香水產品↓
↓【限時搶⚡】白燕NESTURE 必白美肌X烏黑生髮食療！↓
↓ 輕鬆回復素顏肌 / 同時減少白髮 ↓
