食「澳牛光速餐」要用「超光速落單法」
文: C
講嘢口窒窒? 唔好食澳牛，我怕你難堪。
今早小編心癢想食澳牛，我同朋友講：「我去澳牛」，朋友問我：「有事睇唔開? 生活太美滿?」
有看過經典潮文《澳牛的黃昏》的朋友，都知道茶餐廳澳洲牛奶公司，最出名「光速餐」 - 一個客人，由入座到埋單，據稱只需600秒，十分鐘，但過程猶如飽經二戰。亂世中進食，「快」是硬道理，排隊快、落單快、上菜快，你唔可以食得慢，因為你食到一半，就會有伙記望住個碟問你「食晒未? 我拎佢走」；你起身諗住埋單，收銀阿姐見你揸住張紅衫魚，遙遠已經找定錢畀你。
慢，是一種罪過。
這就是澳牛。
其實，食澳牛光速餐而已，大家無需害怕，只要夠快，識得跟上澳牛伙記的步伐，你會發現，澳牛BB實在很可愛。
以下的內容，並非為澳牛平反，乃是真人真事。
-----------------------------------------------------------
排隊等位，十條友喺前面，一般來說，你都要等上幾分鐘。在澳牛，你只需要等53秒。對53秒，我計咗時。
帶位的伙記，聲音沙啞像陳奕迅，問：「幾位? 入嚟!」我強調，這一句沒有尾音，而我像被時代推進般衝了進去。從帶位的一刻開始，Eason一句就將你的固有人性尊嚴徹底擊潰，技術性擊倒，我跟自己說：我是牛我是牛。
為何人們食澳牛食到一肚氣? 很大原因是他們落單太慢，被伙記白眼。不過，只要你落單夠光速，就能夠同伙記做好朋友。何謂「光速落單法」? 先來看看以下人類文明推進過程：
1. 一般音速落單法
就係平常的落單法，睇menu，望吓牆身貼住啲推介... sorry，你已經輸在起跑線上，伙記已經問咗你三次「食咩」。然後你再慢慢道出四個字「茶餐唔該」... sorry，你個該字未講完，伙記已經問你「炒蛋煎蛋意粉通粉多士麵包?」你聽唔清楚? 「炒蛋/煎蛋? 意粉/通粉? 多士/麵包?」請你立即做好人生抉擇，成件事已經成分鐘。記住，佢嘅標準係要600秒內KO你。
一般音速落單法，兩個字 - 失敗。
2. 超音速落單法
Based on 一般音速落單法，我哋大抵可以知道，澳牛伙記最關心的問題，是「炒蛋煎蛋意粉通粉多士麵包?」
超音速落單法，就係入座前背熟落單口訣。一坐低，伙記問你第一次「食咩」，你猶如兵役報到，字正腔圓大叫「茶餐炒蛋通粉多士」，伙記可即時照單全收，三秒完事，超音速。
3. 超光速落單法
先旨聲明，此方法只適合霸氣人士使用。
眾所周知，光比聲音快，簡單啲講，我哋睇嘢係一定快過聽嘢，所以「超光速落單法」，就係用「視覺落單法」。
將你要嘅選項，一次過寫低，記住要精簡，易睇，例如以下iPad內容所示：
伙記行緊埋嚟，你唔好等佢開聲，唔駛講嘢，遠遠就拎個iPad出嚟照住佢，由訊息表達到完成接收，成件事光速搞掂，三秒都唔駛。
能夠用超光速的方法叫光速餐，融入澳牛伙記快線中的生活，你就夠Quali感受澳牛的可愛。
-----------------------------------------------------------
小編小試牛刀，用比較基本的「超音速落單法」，成功過關。
美食光速到站
永遠快到你估唔到的澳牛，在我落單後五秒，檯上已經出現一碟通粉。
五秒。
但我叫的是意粉。我想辯駁，伙記大喝一聲「細路，唔係你嘅嘢唔好掂！」小編二十有六，不知有幾多年入機舖無畀人check身份證，在澳牛，我是細路。
再過三十秒，意粉，煎蛋，多士全部到齊，我戴著的earphone，播著Juno新歌《念念不忘》，chorus都未到，我已經食緊嘢。
快丫嘛，我識做，係咁食。
-----------------------------------------------------------
澳牛的伙記是好男人
《澳牛的黃昏》裡，作者說伙記只當顧客是Tetris的方塊，我不能認同，因為我看到這一個故事。
一位懷孕的年輕媽媽，跟丈夫 (應該結咗婚) 進入澳牛，一路向前行，打算朝向遠處的圓檯，他們背後出現一把Eason聲：「喂，你粗身大細呀，卡位啦。」這把Eason聲，粗豪但柔情，而卡位正是最就近收銀和前口的那一台。
看到這一幕，時間停住了。
澳牛的男人，很快，串嘴，卻很溫柔。
我真的不是為澳牛平反。我記者嚟架嘛，講事實咋。
-----------------------------------------------------------
最後戰績：12:12.07
由於看到大肚婆一幕，我放慢了光速的進食，用心品味澳牛的人情味。
原來，除了大肚婆，伙記仲識同OL搭訕。當然，溫柔，只限對女，我識做的，埋單。
最後戰績12:12.07，食慢咗原來有點唔好意思。
難怪「肯亞徐」在渣馬跑慢咗會自愧和失望。
埋單時，看到阿姐身後的「唯我獨尊」，千言萬語，仍不及道出「唯我獨尊」四個字咁光速。
[後記] 澄清：澳牛唔係劣食
澳牛是特別的存在。我得強調，澳牛不是劣食。
「劣食」定義的本質就是「難食，惡啃到背脊骨落」，但澳牛的招牌蛋，任佢繁忙時間係會質素跌wat，也未至於難食。雖說伙記串嘴，這一餐沒有背脊骨落，我食得好快樂。
Openrice有食評話澳牛「態度唔休做」，「服務態度差到無人有」，寫到好憤怒。
「茶記」定義的本質就是Casual、無服務、簡單、方便又快捷。我認為，話澳牛「服務態度差」的人，同話「齋店無叉雞飯」無分別，那位食評人應該啪咗嘢先寫得出。
只要不執著於所謂的尊嚴，落單前做好準備，食澳牛則快樂無比，人生則圓融無礙。
有些美麗的東西，需要放低自己才能看得到。
留住溫度、速度、溫柔和憤怒。Eason聲。
最新文章：
活動資訊
- 地點
」，
App內睇文同睇片可隨時捕捉U Fun彩蛋，
換領現金券及禮品！
【登記送🎁】L'OCCITANE 3款臻緻節日倒數日曆🎄！
↓一次帶走24件護膚、身體／頭髮護理及香水產品↓
↓【限時搶⚡】白燕NESTURE 必白美肌X烏黑生髮食療！↓
↓ 輕鬆回復素顏肌 / 同時減少白髮 ↓
