傻的嗎？荃灣啲天橋竟然多到連到20商場...(Part 1)
文: C
行一轉荃灣，你會發現，人真係有Unlimited Wants。
自古之來有條IQ題，「香港有個天空之城，你知唔知喺邊度？」一般人都知道，答案係堅尼(離)地城，但我可以好肯定咁話畀你知，香港真係有個堅離地城，叫荃灣。
點解荃灣係咁起橋？
有一排無嚟過荃灣市中心喇，今日先發現，而家行荃灣已經唔駛過馬路，唔駛行紅綠燈。由荃灣站開始，去邊都有天橋，仿如搭通天地線咁，一有商場就要起條橋駁住佢，唔駁硬係唔舒服，強迫症。
你睇，下面呢個T字就係用天橋駁住嘅「空中要塞」，版面大到嚇死人，橫約1400米，直約1000米，痴乸線。
你試過行天橋行到盪失路未。
一切從荃灣站開始
一開閘嘅時候，應聲彈出嘅小編已經離開地面上咗橋，一出嚟就見到富華中心商場(1)，佢間三聯同唯一麵家係企得好硬，咁多年都做得住，係叻嘅。
然後一個轉身就入咗綠楊坊(2)，個商場無乜大特別，活動又唔係多，係個英文「Luk Yeung Galleria」幾靚，原來商場唔止可以叫Plaza、Square、Arcade、Mall，仲可以叫Galleria，幾咁藝術。
經過民政事務處，喺左邊就有條橋搭去噏耷(up dup)商場，嗱唔行住，因為右邊仲有條天橋，駁住下面荃灣城市(3)。
荃灣著名「六度空間」
返黎，我哋正式行入以荃豐為首嘅「六度空間」，呢個名呢，係當年有班成日去荃灣補習嘅會考生改嘅。話說呢度一共有六座商場 - 荃豐(4)、華都(5)、昌安(6)、昌寧(7)、豪輝一號(8)、豪輝二號(9)，想由地鐵站行入豪輝啲補習社，就要行天橋一直路貫穿晒咁多個商場先到，過完一棟又要推門過多你一棟，過足六棟，好似過時光隊道咁，六度空間個名就係咁嚟。
呢度亦係香港噏耷商場嘅典範，一字排開互相連貫，幾團結呀，裡面啲食肆又臥虎藏龍，噏耷商場嗰陣人情味同本土味，係時間浸出嚟架，幾多錢都築唔起到，六度空間確係荃灣陀地之寶。
穿過六度空間，你唔好以為行完，仲有條長橋駁你去悅來坊(10)同酒店，問你死未。
一嘢行咗十個商場，終於見盡頭，但返返去荃灣站，原來我只係行咗成個版面嘅三分一。
天橋陣起到空中要塞咁，Final Fantasy都諗唔出呢個版圖啦，抵玩呀。
太多圖喇，一個post搞唔掂，仲有10個場，下面Part 2待續啦：
傻的嗎？荃灣啲天橋竟然多到連到20商場(Part 2)
http://hk.ulifestyle.com.hk/topic/detail.html?id=ABFGD1ozBw5ZEwNs
相關連結：
活動資訊
- 地點
港生活人氣本地熱話
【寵主請留步】《社群》送您AQUA PRO+TECH「寵物護理入門套裝」🛁！
↓【限時搶⚡】Lanluis MGO520+紐西蘭麥蘆卡紅蔘蜂蜜便攜裝↓
↓補氣血｜改善睡眠品質｜促進腸道健康↓
