屯門全新商場廁所拒對外開放？改裝密碼鎖轉為商戶專用惹議：逼人去公廁

文: 溫藹紅

2025.02.20

屯門全新大型商場廁所近日突然改為商戶專用，被屯門市民發現廁所轉用密碼鎖，疑拒絕對外開放的舉措惹來不少爭議，部分網民更投訴情況「離哂譜」、「逼人去公廁？」不過都有網民表示理由，認為「事出必有因」，相信與用戶的使用情況有關，都有人擔心此舉或間接影響市民來商場的消費慾望。

屯門大型商場廁所拒對外開放？改裝密碼鎖轉為商戶專用

最近有屯門市民發現，區內全新大型商場NOVO WALK的廁所改為用密碼鎖開門，同時更標明「商戶專用」，因而發帖稱「真係裝密碼鎖離晒譜」，在網絡上成為熱門話題之一。樓主上傳一張相片，顯示為男廁門口，現時已裝上密碼鎖，即一般市民無法自行出入使用。不過據指殘廁沒有裝鎖，惟樓主表示「得兩格咋，人多排長龍」。

點擊圖片放大

有關帖文獲不少網民留言，指「唔係寫住商戶專用咩？有密碼唔出奇」，獲樓主回應指「本身個洗手間係對外開放，近日先轉商戶專用」。有網民認為此舉或減低市民在商場的便利度：「其實商場在開放時間都唔能提供客戶基本需要的方便，依種經營手法都好有問題。洗手間絕對是吸引人流一個好方法，這種管理方法絕對只是固步自封」。

網民批評做法：廁所咁基本都唔肯提供

不少市民都批評商場做法：「好記得日本連啲大小小嘅便利店同書店都有廁所，香港啲大商場就連位都唔比您坐（強逼消費），大企業完全無同理心也無營銷策略，所以真心除咗兜路無行入商場好耐」、「要人消費但連廁所咁基本都唔肯提供，即係要人地食完野，即刻返屋企去廁所，唔好行商場買嘢」、「咁多食肆，洗手間都唔比去真係感覺好差」。

▼網民留言▼

點擊圖片放大

部分市民表示理解：每個新措施背後都有一個故事

不過，都有部分市民表示理解：「我明呀，好似K11個廁所無鎖，都俾人用到好恐怖。我同朋友去完都話個硬件係靚呀，但個廁所俾人用到俾污糟過領X啲公廁，成地下有尿有濕廁紙周圍都垃圾」、「我明明地點解會咁做，咁有啲人真係用廁所又用到好污漕GE...就講女廁，無論去到邊個廁所，而家基本上好容易見到成個馬桶成個地下都可以屙到濕曬」、「無問題呀，街邊人成日整污糟個廁所，又唔係有消費」。