屯門「敘利亞風格裝修」租盤爆紅！月租$5000聲稱拎包即住？網民質疑疑似公屋出租

業主放租屯門單位 自稱「敘利亞風格裝修」

日前有港人於Facebook群組「免佣套房出租」發帖放租，表示單位位於屯門碼頭附近，以月租5,000元出租，並寫道：「屯門區近碼頭 業主免佣 敘利亞風格裝修 鄰近交通配套方便 月租5000 拎包入住 PM詳細資料」，同時上載多張單位內部照片。

從相片可見，單位疑似屬舊式公屋格局，天花及牆身大面積泛黃，部分位置更出現明顯剝落痕跡。屋內擺放大量雜物，環境略顯凌亂，床褥亦有發黃情況，整體觀感與一般租盤有明顯落差，而業主以「敘利亞風格裝修」作招徠，更成為網民討論焦點。

+2

點擊圖片放大

網民震驚：送畀我都唔要

不少網民看過照片後大感震驚，認為單位環境欠佳，難以接受月租$5,000的叫價，紛紛留言表示「睇見都唔想行入去」、「唔駛錢都唔住」、「間屋好恐怖」、「睇到個身都覺得痕...」。對於租金水平，亦有網民質疑「屯門仲要5000？食懵咗你呀」，更有人揶揄「拎包入住，即係業主無打算重新裝修啦」，直言即使免費亦不會考慮入住。

「敘利亞風格」成焦點 網民：佩服業主勇氣

相比起單位本身，不少網民更被業主的描述逗得哭笑不得，「好一個敘利亞風格裝修」、「敘利亞風格，條友噏得出先好嘢」、「敘利亞，佩服你有租出去嘅勇氣」等。亦有人笑言「估唔到真係有咁有特色嘅屋」、「敘利亞風格都唔錯，好過加沙風格喎」，認為業主以自嘲方式形容單位狀況，意外成為帖文最大賣點。

即睇網民留言

+8

+7

點擊圖片放大

部分網民認為翻新後「就住得」

不過，亦有網民認為單位只是較為殘舊，若願意花時間及金錢翻新，未必完全沒有吸引力。有留言指出「油一油油應該好好多，幾十年無裝修一般都係咁嘅樣」、「成間5000？租嚟整整佢再劏...有錢賺」、「若果租約簽10年（租金5000），業主補咗地價話之佢，執下佢就住得」。

網民質疑疑似公屋出租：可以租俾人咩？

除了單位狀況外，亦有不少網民關注物業背景，並根據照片推測單位或位於屯門湖景邨或蝴蝶邨。部分人進一步質疑單位是否符合出租規定，留言稱「湖景邨可以租俾人既咩？」、「蝴蝶邨好似冇租置計劃架喎，咁係咪即係舉報得？」亦有人提及房屋署近年推出的舉報濫用公屋機制，表示「舉報濫用公屋可以有三千獎金」，引起其他網民討論。

即睇網民留言

• 睇個閘都知係公屋
• 湖景邨可以租俾人既咩？
• 蝴蝶邨好似冇租置計劃架喎，咁係咪即係舉報得？
• 公屋租俾人係咪買咗補咗地價先？
• 幾十年公屋係咁，不過公屋租俾人係咪買咗補咗地價先？
• 舉報濫用公屋可以有三千獎金

屯門僅4個租置計劃屋邨 出租前須先補地價

翻查資料，現時屯門區納入「租者置其屋計劃」（租置計劃）的屋邨僅有4個，分別為建生邨、田景邨、良景邨及山景邨。若業主已購入單位並完成補地價程序，理論上可按私人住宅形式於公開市場出租或出售。

延伸閱讀：

不過，若屬未補地價單位，或仍屬公共租住房屋單位，一般不得擅自出租或分租。房屋署資料顯示，出租／分租、協助出租／分租公屋單位以收取利益，或租住非法出租／分租的公屋單位，均屬嚴重濫用公屋行為。

根據《房屋條例》第28A條，上述行為屬刑事罪行，一經定罪，最高可處罰款50萬元及監禁1年。此外，房屋署亦設有舉報濫用公屋機制，若舉報資料真實並成功協助房屋署證實個案，舉報人更有機會獲發$3,000獎金。

+6

+5

點擊圖片放大

來源：Facebook@免佣套房出租、Facebook@裁員炒人消息關注組、房屋署