同女朋友鬧交唔緊要,唔好隔夜就得喇!

文:
2016.02.05

文:藍橘子


 
男人拍拖最緊要學識一種技巧,就係點樣同女朋友鬧交!
唔係叫你拗贏佢,而係點樣盡快撲熄呢場毀滅性災難…
 
記得有段期間,我同女朋友小豆經常鬧交。三日一小鬧,五日一大鬧。完全無預兆點發生,亦唔識點樣阻止,只能夠迷信地諗「係咪我著咗呢隻顏色襪所以鬧交呢?」「會唔會我食得辣嘢太多?」「前兩日我無幫襯妹妹賣旗,關唔關事?」
 
終於,我同佢都似乎到咗極限,意識到需要諗辦法搞清楚,到底係八字相剋,定前世撈亂骨頭。
「點解我哋好似成日都鬧交嘅…」
「係囉,上次因乜事鬧?」
「…」諗咗好耐,我哋兩個都唔記得。
 
其實好多時鬧交都只係因為好少嘅事,或者某一句說話語氣重咗…
「你咁惡做乜?!」
「我無啊…」
「你有!」
「無啊!」
咁樣已經可以鬧餐懵…
 
為咗一件隔日就唔記得嘅小事而鬧足幾日交,你唔睬我,我又唔理你…
冷戰係又攰又辛苦嘅一件事,都唔知為乜。
 
所以,我同女朋友決定,每次鬧交都唔可以留隔夜,一定要即日解決!因為隔夜就會臭,臭就一定演變成冷戰!呢個係定律黎!
 
女朋友,係一種發脾氣就特別鍾意CUT人線同唔聽電話嘅生物,我問過佢點解,係咪眼火爆,綠色接聽同紅色收線都撈亂…
佢話:「唔知點解呢,我望見你打畀我,我CUT你線心情就會好啲!」
「咁咪隔夜囉!」
「咁你又唔氹我!」
「妳猛CUT我線,我成晚淨係對著『你已被接駁到……留言服務』點氹妳啊!」
「又係喎…話時話你咁惡做乜?」噢Sorry my lady。
 
所以,我哋就約法三章,就算幾嬲都好,都唔可以唔聽電話。
「仲有啊!妳次次發親脾氣就唔准人掂妳,要行開兩隻手臂範圍之外,點樣隔空氹啊大佬!」
「唔~~好啦,以後唔會。」
「仲有!唔准唔出聲,擺聽唔到!我完全唔知妳嬲乜!」
「知道囉!」
 
嘿嘿,咁就可以確保一定唔會有「隔夜交」嘅出現喇~
自此之後,每次鬧交,我同女朋友都會盡情將不滿發洩晒出黎,有時仲演變成到幾好笑,令我肚裡面團火都即時熄晒。當女朋友唔知講乜好,但又唔服氣想駁返我嘅時候,就會出現語無倫次嘅狀態…
 
「你個口咁大!我實唔夠你講嫁!」
「嘩妳人身攻擊…」
「死人大鼻仔!四眼仔!哈哈哈!」鬧吓鬧吓,唔知點解就笑咗出黎。
 
至於有乜方法可以一晚之內極速氹返女朋友呢?!老老實實,呢個問題仲難答過有雞先定係有蛋先。就算你捉住愛因斯坦問佢,佢都只會伸一伸脷答你:「I dim G wo」
因為連女朋友自己都唔知,所以有句說話好危險,就係問佢:「妳想我點做妳先肯笑返?」
你問佢一條連佢自己都答唔出嘅問題,等同你用汽油黎救火係一樣道理。
 
其實要令女朋友開心返好簡單,只需要瘋狂咁氹佢就可以。無論用咩方法氹,用少少時間耐性佢一定會開心返。一個女仔若果愛你,絕對唔會畀個男朋友跪喺街上面摑佢十四巴。(偷食除外)
 
男子漢大丈夫,目光要放遠少少,主動開口氹返女朋友,並唔係咩喪失尊嚴嘅行為。
因為只要氹返女朋友,你就會發現,鬧交過後總係特別甜蜜。

咁咪Win Win囉。 

 

 

本篇圖文獲作者藍橘子授權刊登,未經准許,請勿轉載!

藍橘子Facebook:https://www.facebook.com/BlueGodZi/

 

作者其他文章:

>> 右手係我女朋友 

>> 點用電話最慳電? 

>> 倒數最重要是當我數到0,身邊是妳… 

>> 坤哥,一個努力的最好例子 

 

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【限時搶⚡】健之堂袪濕茯苓艾草足貼!↓

↓ 含三大中草本配方!/ 有效祛濕毒袪水腫!↓

↓ 含三大中草本配方!/ 有效祛濕毒袪水腫!↓

↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

↓ 首創含微量酒精代餐 / 嚴選高級可可粉 / 加水即沖即飲!↓