租客要求業主維修熱水爐 返到屋企發現成個爐離奇消失!?

2022.05.30

關於業主同租客嘅各種糾紛,真係無日無之!今次就有網民喺Facebook一個租屋群組入面訴苦,話因為屋企嘅熱水爐壞咗而要求業主負責維修,點知某日外出後返到屋企,竟然發現屋企嘅熱水爐成個消失咗!令佢非常不知所措,事件亦引起其他網友熱烈討論:究竟點解會有咁樣嘅事情發生呢?租客究竟係咪可以告業主呢?

村屋熱水爐冇熱水 業主拖字訣
成件事其實係咁嘅:樓主租住緊村屋,而租約寫明有包熱水爐,樓主最近發現熱水爐有故障,未能持續地有熱水,但同業主反映後,業主堅持熱水爐冇壞,因業主在測試時剛好有熱水,最後導致該網民已經有兩個星期要用水壺煲熱水沖涼!然後網民在地產代理嘅幫忙下,業主最終答應會搵師傅負責維修……當樓主以為件事已經解決,原來都只係惡夢嘅開始……

村屋租客因被業主拖延維修熱水爐達兩星期,感到非常困擾。

返到屋企發現熱水爐離奇消失!?

點知,業主在未有事先通知下,有一日突然通知樓主已到屋企準備維修,但樓主當時並唔喺屋企,而業主最後則在樓主同意下獨自入屋維修。隔咗一陣,樓主追問業主維修結果如何,但得唔到業主回覆!最後返到屋企,竟發現成個熱水爐唔見咗!經追問後,業主只是答覆熱水爐嘅維修需時十日。而樓主喺事情發生後表示相當無助,惟有向網民求救。

業主在未有通知租客的情況下,擅自將整個熱水爐拎走。

業主需免租,直至維修完成?

關於呢件「熱水爐離奇消失事件」,網民都熱烈討論!有網民表示自己有類似經歷,業主係需要免租至完成維修:「業主要免租到搞掂為止,我之前試過」,但樓主表示:「我未講免租,佢已經覆都唔覆」。另外有網民就提議問業主拎錢住酒店:「同佢傾住酒店claim返,10日喎,真係搞唔掂」。

有網民認為村屋業主特別差:「公開邊條村,不過我想講,租得村屋,業主9成都係x街,我之前都試過,壞咗抽氣扇都唔x整,以後都租屋苑好過,至少業主有文化好多」、「村屋有啲業主持自己係本地人,好唔講道理,好x街!」

有網民認為樓主應該要向業主提出免租或claim返酒店住宿費。

由呢件事,引申到網民討論:究竟村屋業主係咪特別麻煩。

點解樓主租屋唔換鎖?!

意見亦非一面倒,有網民則認為業主做法並無不妥:「但係我見到係你批准佢入屋,佢有問你,無錯喎,咁佢咪話同你整返個爐,咁又唔係佢自己整,咁整幾多日佢都控制唔到嘅,其實佢都算係咁,無屈你整爛個爐要你賠,佢都算係有責任」、「佢拖你唔整,點止十日冇熱水用,肯整仲要俾你唱」。但有不少網民隨即反駁:「怪返受害人轉頭,笑死,個業主拖拖拉拉嘅態度,仲要咩都無交帶情況下拆走熱水爐,佢口講話10日啫,你點知佢真係10日內畀返你?吾好講到業主肯整係大恩大德先,非人為損毀呢啲係業主嘅責任嚟」、「咁要唔要跪地感恩呀?」

另外有網民提問:「但其實我又唔明業主點解可以自己入屋?」樓主則表示:「佢有keep一套(鎖匙)呀,其實咁樣有冇問題?」網民認為其做法非常有問題:「其實好大問題,你搬入去應該要換鎖膽,因為佢仲開到你門,你唔見嘢,邊個負責任?」

雖然有網民認為業主肯負責整熱水爐,樓主都唔應該埋怨,但反而覺得點解樓主租屋唔換鎖,令業主可以自行入屋。

text/Jonathan
photo/HKET圖片庫
========
同場加映
【蝸居睇樓團】上門睇風水!龍師傅帶睇九龍城47年舊樓旺氣不再?鏡對睡床影響情緒+屋企太暗多病痛

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【隆重登場】香港咖啡地圖2022!↓

↓即睇精選50間咖啡店(附評分及介紹)↓

即睇精選50間咖啡店(附評分及介紹)

↓「App限時搶」大派禮品↓

↓記得逢星期三3PM入App搶!↓

記得逢星期三3PM入App搶!

評語

相關文章