食在西環午夜時　邪惡宵夜逐間掃

要搵阿一，唔使用Google map嘅，用你個鼻就得架喇。

行過去，未食都已經聞到一陣酸辣又帶點肉香的香味。雖然寫「酸辣」，但湯底除了有酸辣的惹味，亦有麻辣的刺激，最正嘅係湯一啲都唔油。招牌嘅豬扒啖啖肉，食厭米線仲可以揀上海麵添。

地址: 西環卑路乍街7-11號海都樓地下C1號舖
營業時間: 11:00-23:30 

你仲記唔記得初吻嘅滋味？個份酸甜感覺，就算未有初戀情人都可以係呢杯初吻奶茶感受到。初吻奶茶其實係茉香奶茶加蘋果蜜，甜中帶點酸之餘，仲好清新。

可可唔止有台式飲品，炒飯、撈麵、小食、甜品、粥都有，而且價錢唔貴，所以一到宵夜時間都坐滿人。如果有讀港大又有住Hall既朋友一定識食腸粉加蛋同蠔餅！唔夠喉？黎多碗豬手丫唔該！

最尾可以食返碗腐竹蛋糖水。講起呢碗糖水，當日我同台灣朋友去食先知原來台灣只會當腐竹係餸，唔會用黎煮糖水。結果台灣朋友食個時，總係忍唔住想隔開腐竹同糖水食。但可可呢碗腐竹蛋糖水煮得咁綿，都好難隔開啵。

地址: 西環卑路乍街136-142號聯威新樓地下E及F舖
營業時間: 16:00-04:00 

飲夜茶又點少得新興。新興最出名嘅一定係流沙包，每次食都要小心唔燙到個嘴，事關一咬，裡面既熱辣辣嘅蛋黃餡就湧出黎！

喺新興仲可以食到唔少懷舊點心，好似炸鮮奶同鵪鶉蛋燒賣，金錢肚同糯米雞亦係必食之選。真．糯米雞真材實料，入面啖啖雞肉架。

地址: 西環堅尼地城士美菲路8號地下C號舖
營業時間: 03:00-16:00 

近年車仔檔買少見少，更何況係炭爐雞蛋仔？呢檔雞蛋仔唔係時時有，撞啱夜晚老闆得閒先會出現慰藉大家空虛嘅胃，所以食唔食到好睇彩數。

雞蛋仔即叫即整，熱辣辣之餘仲帶點炭香添。

地址: 不定