正在閱讀
飲綠寶橙汁、跳飛機! 穿梭時空尋回昔日的老香港

飲綠寶橙汁、跳飛機! 穿梭時空尋回昔日的老香港

2015.08.07

「經過那些年~跟你重回那天暑假...」唔知你仲記唔記得,細細個做小學生個陣的舊教科書,仲有80年代好興的「綠寶橙汁」?如果你好回味那些年,但又唔知點搵佢地,唔駛怕,今期周圍遊就帶你穿梭時空,去哂港九新界尋覓大家嘅「集體回憶」。好啦,我唔唱歌啦,走吧~走吧!

 

第 1 站 萬歲 Hooray 綠寶橙汁、懷舊玩意返哂嚟

講起橙汁,識飲嘅一定係飲「綠寶」!(有90後弟弟以為係「綠水」嘅朋友……)不過呢隻80年代hit爆嘅無氣橙汁喺香港幾乎已經絕跡啦,多得有「萬歲」呢間小店令佢翻生,仲要係枝裝凍上,再配埋碗地道車仔麵,真係咩回憶都返哂嚟!值得一讚嘅係店內裝潢好有心思,無論紅白機、漫畫定扭蛋機都一應俱全,真係令大家好懷念呢!

「集體回憶」影相位:

1.櫈(店舖7月尾裝修過,普通櫈變哂做飛行棋形啦!)

2.牆(全牆用咗多達70本漫畫來佈置,最啱自拍!)

 萬歲 Hooray詳細介紹及前往方法:

http://hk.ulifestyle.com.hk/spot/detail.html?id=ABdGDVo3Bw1ZEANq

第 2 站 老馮茶居 品嚐老香港傳統點心

飲茶除咗食「推車仔」點心外,仲有得樣點懷舊呢?呢間小店就勁啦,佢將七、八十年代嘅「老香港」元素通通帶茶居內,除咗有鐵皮士多形的水吧、錢莊似的收銀處、就連上層都變哂做屋邨咁款,超級精緻!至於食物方面,就以傳統點心為主,當中以鵪鶉蛋燒賣口碑最好。所有點心新鮮製作,即叫即蒸,等耐啲都值嘅!

「集體回憶」影相位:整間店 (餐廳內每個設計都用心,值得謀殺你菲林!)

老馮茶居詳細介紹及前往方法:

 http://hk.ulifestyle.com.hk/spot/detail.html?id=ABdGDVo3BwJZEwNt

第 3 站 賽馬會鯉魚門創意館外 小小天地跳飛機

如果你識唱 「天空海闊任鳥飛,小小天地跳飛機~」恭喜你,你應該係同小編同一個年代嘅哈哈。話說跳飛機呢啲兒時玩意,而家已經買少見少,雖然呢種遊戲嘅玩法其實都只係跳下跳下,不過又幾過癮,最抵死係睇住個朋友失平衡或者仆親嘛!(拿唔係我黑心 只係確實經常發生)

「集體回憶」影相位: 賽馬會鯉魚門創意館外 (日落時份尤其有feel!)

山長水遠嚟鯉魚門淨係跳飛機?當然唔係啦,睇埋呢篇周圍遊你就知鯉魚門都可以玩成日: 

《慢活一日啦~ 鯉魚門歎Cafe、看日落悠閒據點遊

賽馬會鯉魚門創意館詳細介紹及前往方法:

http://hk.ulifestyle.com.hk/spot/detail.html?id=ABdGDVo2BwtZHwNp 

第 4 站 舊課本展示館 教科書原來好好睇

喺呢個幼稚園生都已經教「precipatation」嘅年代(呢個字明明係我中一先學),實在令我不禁回憶下:究竟我細細個係學咩生字呢?如果大家都有呢個疑問,不妨嚟「舊課本」呢度尋下寶,睇下不同年代嘅課本,回味一起上學的日子!

店內主要收集六七十年代嘅書籍同生活用品,而展示館仲會定期舉辦不同主題嘅小型展覽同活動,一齊分享舊香港故事,好正斗!不過呢,展示館暫時只開星期六下晝,大家小心摸門釘呀!

「集體回憶」影相位:書內頁!(會發現爸爸都化妝~哈哈)

舊課本展示館詳細介紹及前往方法:

http://hk.ulifestyle.com.hk/spot/detail.html?id=ABdGDVo3BwNZFwNo

免費登記成為U Lifestyle 會員
即時接收最新資訊並盡享獨家優惠

免費登記成為U Lifestyle 會員
即時接收最新資訊並盡享獨家優惠