宵夜食乜好？港島區 4 條大路慢慢掃！

大坑、天后一帶出名多好嘢食，而且唔少係主打晚市同宵夜，所以愈夜愈精彩。

要打冷，可以揀大坑銅鑼灣道鄭記(~01:00)，鵝片、蠔餅、蜆仔肉等潮州特色小菜一應俱全；鍾情滷水嘅又可以去天后潮州邨(~00:00)，滷水鵝肝、鵝腸同鵝肉係招牌菜。

當然，天后電氣道同清風街一帶都有其他好選擇，足料嫩滑清湯腩 - 華姐、大利(兩間一樣~23:00)、甜姨姨(~02:00)芒果布甸、芒果雪糕、芒果乾等集合於一身嘅「大合奏」都係夜鬼推介，總之咸有咸食、甜有甜食，你係老闆，實有得揀嘅。

如果你自認「重口味」、或無辣不歡，咁就建議你嚟到謝斐道搵食！

喺呢條街，一蘭開廿四，你知架啦，咁除咗有岩一個人「重口味」地面壁思過食拉麵外，仲有會食到令你高呼「辣得好過癮呀！」嘅橋底辣蟹(~06:00)同隨變麻辣雞煲(~02:00)！剩係睇相紅噹噹咁，都已經熱血沸騰，最岩三五知己一齊嚟「啤啤」佢！ 如果要食甜品，銅鑼灣都有店開到凌晨兩點。

大鑊呀你，熱氣又夜訓，出街帶定暗瘡膏啦。

情陷中環，個人有啲空虛，想食啲嘢，唔係又係翠華下話？即係呢，翠華就無話唔好，但係呢間嘢一到夜晚就唔係去嚟食嘢嘅，而係畀人去做「食物安全驗證」嘅，廢事阻住人入座做正經嘢啦。

想食糖水，可以踩上荷里活道鐵皮檔玉葉甜品(~00:00)，食芝麻糊綠豆沙，都市傳說玉葉個阿姐係串嘴嘅，醒定啲。至於有「為食街」之稱嘅士丹利街，最有特色嘅其實係一堆好有風味嘅大牌檔，不過到咗夜晚就通常收檔，盛記係少數會開到夜晚11點嘅。

想食大牌檔？可以睇埋下面推介呀：（但唔係畀你宵夜去食架）

《鐵皮檔好風味！香港4間響朵鐵皮大排檔》

卑路乍街仍然有唔少好味食店，讀港大兼有住Hall嘅朋友，應該對可可店(~04:00)唔陌生，因為佢都算係西環區宵夜「經濟之選」。據港大某學生透露，識食嘅，一定係食腸粉加蛋！

西環小食店之寶真滋味(~04:00)，係原居民首推最邪惡嘅宵夜，假若你住港島西區，夜晚收到某個朋友來電「食唔食真滋味」，你小心啲，呢個朋友想你肥死。首推當然係雞髀，可以揀炸髀同燒髀，燒髀要等15分鐘，建議打電話落去留定。

另外，呢度有間阿一豬扒酸辣米線分店，開到23:30，想食豬扒、手撕雞可以嚟呢度。