熱愛優質生活
首頁   \   港熱話   \   其實,Godiva 喺當地人眼中只係普通朱古力牌子

其實,Godiva 喺當地人眼中只係普通朱古力牌子

其實,Godiva 喺當地人眼中只係普通朱古力牌子
2015.12.10

文:Kennth Ng 文字煮酒

其實,Godiva 喺當地人眼中只係普通朱古力牌子

如果你走去問尋日排 Godiva 雪糕買一送一嘅人,究竟 Godiva 係黎自咩國家,我諗,至少有三份一人答你唔出。佢地可能會話,英國咯,法國咯。未必個個會知道,Godiva 係一個比利時品牌。而當呢一堆人以為自己排緊一啲「high卡」野嘅時候,佢地亦都唔會知道,係比利時當地人眼中,Godiva 只係一個好普通嘅連鎖朱古力品牌。

比利時除咗盛產啤酒同薯條,最出名嘅就係朱古力。據統計,比利時全國就有超過 2000 間朱古力店。比利時三大朱古力品牌之中,Neuhaus 賣得最貴,而佢地亦都係全比利時最歷史悠久嘅品牌﹕Leonidas 係三個品牌之中賣得最平嘅,歷史冇 Neuhaus 咁耐,但都有超過一個世紀﹔Godiva,朱古力價錢介乎佢地兩個之間。頭先講「三大品牌」,意思並唔係話佢地係比利時人眼中最好食嘅三款朱古力牌子,只係話,佢地係最出名嘅三個連鎖牌子,marketing 做得好,世界各地都有佢地嘅鋪頭。或者,Neuhaus 喺佢地眼中都算係一隻幾出色嘅朱古力牌子,但 Godiva 同 Leonidas,就真係好普通賣俾旅客嘅連鎖牌子,唔係話唔好食,但就真係好普通。

介紹番兩個有特色嘅比利時朱古力品牌俾大家,香港冇鋪頭,有機會去比利時或者有佢地鋪頭嘅地方旅行,可以考慮幫襯下:

1. Wittamer

比利時皇室最愛嘅品牌,除咗朱古力,佢地仲有出產蛋糕雪糕其他甜品。1999 年佢地幫皇室設計大婚所用嘅婚宴蛋糕,喺比利時係好有權威嘅一間甜品店。四年前喺布魯塞爾 (Brussels) 旅行試過佢地嘅 praline 朱古力,質素比 Godiva 同 Leonidas 好,同 Neuhaus 就差唔多。Wittamer 歷史比 Godiva 同 Leonidas 更悠久。

https://www.wittamer.com 

2. Pierre Marcolini

一個比較新派嘅朱古力品牌。比利時人好少好似法國人咁,搞味道 fusion。呢個品牌係一個例外。佢地主張自己嘅朱古力味道同酒一樣咁有深度,佢地亦都可能係比利時第一個將朱古力帶上去藝術層次嘅品牌。當然,佢地嘅價格亦都非常昂貴。

https://eu.marcolini.com

香港人好鍾意排食野隊,但唔知點解成日跟埋啲根本唔值得跟嘅隊。一蘭,喺日本根本就係好普通嘅拉麵,就算嚟到香港,佢嘅質素都只係中下水平﹔Jamie’s Italian,啱啱嚟香港時新聞話 booking full 哂,喺歐洲佢只係一間平民餐廳,喺倫敦同聖彼德堡 (Saint Petersburg) 食過,味道普通過乜,早幾個月冇乜人走去試下香港鋪,燒鵝價錢,蔗渣味道。Godiva,都唔講排個幾鐘換個雪糕你時薪幾多錢值唔值,又或者買一送一份量減半 on 唔 onX,呢個牌子根本就唔值得你去排。Godiva 對於比利時人嚟講,就等於澳門人嘅咀香園同香港人嘅奇華,幾有代表性,難食咩?又唔係嘅,不過 as a local 一定有更好嘅選擇咯。

香港人,最鍾意追住人地嘅二等三等貨當係「high 卡」野。

呀,最後都想提提大家,今晚(編按: 文章刊出日期為9/12)立法會門口又有雪糕派,記住早啲去排隊。作為一個香港人,呢個 cone 你冇理由唔搶架?!

 

封面圖: j3tourshongkong.com 

 

本篇圖文獲作者Kenneth Ng 文字煮酒授權刊登,未經准許,請勿轉載!

Kenneth Ng 文字煮酒 Facebook: https://www.facebook.com/wordsandalcohol

 

內容評分
評語