立即試食 麥當勞唧唧芝士薯條

自從福喜事件之後，麥當勞真係好積極想挽回聲譽，可惜吃力不討好，繼上月新產品「蘋果批新地」被發現太少雪糕，會貴過分開叫一個蘋果批加一個新地撈埋，今日 (9月26日) 新出的「唧唧芝士薯條」，食寢評語好壞參半，我決定親自試食一次... 

今日，打算與其餘六人一同嘗試一次唧唧薯條。入到門口，一望老麥職員頭上的餐牌，價錢$15，我問職員，個薯條咩size，佢話係一個中薯條，一個中薯條都只係$11，包芝士同煙肉要四蚊。

買外賣回來，薯條用蝙蝠俠薯條盒載住，甚有心思，原個中薯條掉咗落去。 

然後，我只見到一個芝士包... 咦，說好的煙肉呢? 然後我搵埋袋底，都唔見有煙肉，不妙，職員畀漏咗我。 

「啪!」唧開芝士包，車打芝士醬即被唧出，一條條唧出來。

雖然無煙肉，繼續試食時間，一評車打芝士醬。車打芝士味道唔算濃，咸味多過芝士味。其他感想包括「嘉頓芝士夾心餅似乎更加濃味，仲有塊餅食，呢包芝士唔抵食」、「味道唔夾，薯條已經好咸，加埋個芝士醬仲咸。」加上無說好了的煙肉，味道好寡。

在場共七位試食陪審團，裁定唧唧薯條唔抵食，芝士味唔夠... 不過個盒都OK，有點安慰。

希望大家試食的時候，望望Staff有無畀齊煙肉脆脆同芝士，同埋叫薯條少鹽。 

文: Miii