叱咤樂壇頒獎典禮2024｜張敬軒長文回應Ian陳卓賢金獎宣言 罕有撰1276字剖白密友感情
叱咤Ian金獎宣言 ｜《2024年度叱咤樂壇流行榜頒獎典禮》於元旦日晚上在亞洲國際博覽館舉行，今年Ian陳卓賢成為大贏家，首度獲頒男歌手金獎、唱作人金獎，破天荒榮升「雙金」。Ian在台上發表得獎感言更公開多謝密友張敬軒，並提到張敬軒兩年前將叱咤男歌手金獎獎座送給他，一番言論被網民發大發酵。張敬軒今日（2日）於社交平台親自撰寫千字文回應。
Ian甜笑公開多謝密友張敬軒
Ian在台上發表得獎感言時，就公開多謝密友張敬軒，Ian一邊甜笑一邊透露兩年前張敬軒的一個窩心舉動，一直鼓勵著他。Ian表示兩年前，張敬軒奪得男歌手金獎時，就將金獎獎座送給Ian，希望以後有一日Ian會攞到這個獎，來到兩年後的今天，Ian終於一嚐金獎滋味，直言今晚就會將獎座還給張敬軒。
張敬軒千字文回應
張敬軒今日（2日）於社交平台發表千字文，回應了Ian陳卓賢的「金獎宣言」。兩年前，張敬軒在其20週年演唱會上邀請了Ian作為其中一位表演嘉賓，當時Ian的狀態表現給予張敬軒一種焦慮和憂鬱狀態。後來兩人逐漸熟絡，張敬軒在Ian身上看到了自己當年出道初期的影子，並希望能幫助Ian克服前路茫然的困難。
張敬軒表示不忍心他浪費自己青春和時間，於是兩年前就「有一晚抽起條筋」，將男歌手金獎獎座送給Ian，叮矚他放在「寫歌嘅嗰張枱嘅枱頭」，希望能激勵他追求自己的夢想，最後更提到Ian昨晚「漏夜同同事一齊送返我個獎座畀我」。
▼▼點擊睇張敬軒千字文剖白▼▼
張敬軒原文如下：
「都講開咯, 唔爭在講埋。
關於Ian單嘢其實係咁嘅：兩年前我20週年紅館演唱會搵咗阿姜、陳仔、Jer嚟為我擔任表演嘉賓。嗰陣時嘅佢, 不苛言笑, 又唔係好同人講嘢, 畀我一種處於焦慮同埋憂鬱嘅感覺, 佢嚟彩排嘅時候嘅狀態, 再加上演唱會之後佢搵我幫佢監製一隻歌, 我哋慢慢熟絡咗, 我喺佢身上睇到咗05至07年嗰個階段嘅我, 經常散發出一種對前路茫然嘅感覺。我覺得佢哋12個仔個個都叻, 各有各叻, 但係畢竟每個人嘅際遇都唔同, 要面對同解決自己原生家庭所帶來嘅困難亦都唔同, 嗰段時間會經常見面嘅就係得Ian, 我覺得做我哋呢行成名要趁早, 睇見佢日日咁樣吽吽兜兜, 係唔忍心佢浪費自己嘅青春同埋時間。
我透過祈禱同埋吸引力法則, 獲得過好多我嘅人生目標同埋夢想, 古人有雲：授人以魚不如授人以漁, 與其寫隻歌畀佢請佢做個演唱會嘉賓, 不如教佢點樣重新打返開自己, 調整自己嘅能量, 學識自己為自己嘅夢想同目標而努力。於是我有一晚抽起條筋, 我話陳卓賢你喺邊？我攞樣嘢畀你。 於是我的咗個嗰年嘅男歌手金獎獎座畀佢, 我同佢講, 好老黎㗎, 你擺佢喺你寫歌嘅嗰張枱嘅枱頭（comment續）
望下望下就有㗎啦, 你要鞭策你自己, 學我老闆話齋, 做人要爭氣！要為自己爭氣！
於是條友攞返屋企, 擺咗喺抬頭, 影咗張相畀我,就係咁。
尋晚到而家呢十鬆啲個鐘頭, 網上嘅各種報導呀言論呀我都立咗一立, 我想講嘅係, 我哋每個人嘅經歷或者社會嘅文化會將我哋教育成為某一種人, 或者會無意之中為我哋培養咗某一種嘅價值觀, 有時可能係羊群效應, 「因為身邊嘅人係咁所以我都應該係咁」但我覺得我哋有獨立思考嘅能力, 點解「因為個世界差, 所以我哋我哋都要去做差嘅事會比較容易生存呢？」點解唔可以相信, 我做一啲、你做一啲、佢又做一啲好嘅嘢, 個世界就會變返好㗎喇......成日帶住猜度同防備心做人好辛苦, 好艱難, 呢個永遠都唔係我做人嘅option。
我暫時想講嘅嘢係咁多, 諗到再同大家分享🩷
PS. 陳仔好均真, 尋晚漏夜同同事一齊送返我個獎座畀我, 我有話畀佢聽尋晚黑唱live炒車, 相當唔好。當然我哋行內人知道叱咤台個音響咁多年以嚟都係一個挑戰（關於點解係挑戰, 有興趣嘅喺度留言, 我可以專門開個post講）, 但係我同阿陳講, 我跟過甄妮、朱咪咪、陳潔靈、肥媽呢啲前輩搵食, 無論個音響幾有問題, 一上台揸住支咪,紮實嘅唱功就硬硬正正咁樣喺嗰度！觀眾係唔需要去bear我哋喺硬件上所遇到嘅問題, 觀眾淨係嚟享受㗎咋。我有同佢講：無論因為乜嘢原因, 自己當晚嘅表現唔好嘅話, 就好好記住呢一種唔開心嘅情緒, 唔好放過自己, 將呢種情緒變成你去訓練去進修嘅動力！點解我有時會好認真咁樣上網睇人點樣鬧自己呢？因為令你進步嘅方法嘅答案就喺入面！當我哋面對批評嘅時候我哋要抱住 MAYBE YOU ARE RIGHT 嘅心態！
佢諗一諗, 然之後答我：我一定會再練多啲, 一定會越來越好！我有同佢講、我亦都有喺現場同柏宇講, 阿姜嘅唱功進步咗好多！」
港生活人氣娛樂新聞
↓【限時搶⚡】原箱高鈣梳打餅↓
↓黑芝麻 / 芥末味｜口感香脆、高鈣健康↓
↓【限時搶⚡】Lanluis MGO520+紐西蘭麥蘆卡紅蔘蜂蜜便攜裝↓
↓補氣血｜改善睡眠品質｜促進腸道健康↓
