認住佢撇鬚！整錶大叔拆解做到最後一刻的原因，再介紹街頭的奇人異事
文：CC
上星期講完《霸氣酒樓阿姐的故事》，今個星期講乜好？
前幾日，一張「污糟手」相片觸動了好多人的情緒，直呼「污糟無罪！」。這張相片令小編想起很多辛勤勞動而換取生活的人，修車師父、地盤工人、清潔工人等等等等，有沒有遺漏呢？有！有日收工途徑觀塘，遇見了他。
我稱他做「二撇雞大叔」，從街坊與他的談話中，二撇雞大叔似乎很享受別人叫他的鬍子做「二撇雞」，亦好enjoy顧客欣賞他的鬍子。大叔一臉正氣，應該沒有太大「攻擊性」，膽粗粗的我就決定坐下來跟大叔談一談。
原來二撇雞大叔是潮州人，在香港生活多年，鄉音仍然很重。小編有時聽唔到，就唯有扮明，「係」、「哦原來係咁」、「知道知道」。大叔說自己好「大命」，小時逃過意外，逃過批鬥，家人朋友中就只有他能夠活着；後來打過魚，學人賣過豆腐花，最終跟街邊師傅學師，自己擺檔維修鐘錶，典型的香港老一輩。
：「你整錶整咗幾多年呀？」
：「嘩唔記得囉，由銅鑼灣開鋪，到而家開檔，耐到我都唔記得啦！你估我幾多歲？」
：「55？」（估細3、4年，等阿叔開心吓）
二撇雞大叔從銀包取出他的身份證，得意地show給我。
：「我67啦！你特登估細啲等老人家開心嘅！阿妹你呢？三十歲未？」
我崩潰，三十歲！！雖然間唔中都有「天真的」小朋友叫小編做姨姨，但無論如何「阿妹」都不似30歲吧！阿叔，你好唔比面姐…
：「我22…」
「份工悶唔悶？」
：「大叔，其實一日坐喺條街度咁多個鐘，無生意時有乜好做？」
：「聽收音機囉，我最鍾意聽陶傑。」
雖然二撇雞大叔說自己無文化，無讀書，但從他的談話中，小編覺得阿叔骨子裡根本就是一個博士。突然講句古文，突然叫我猜謎語，突然問我有無讀過xxx的詩，天啊，在大叔面前我根本就是個文盲，我是不是也要聽陶傑惡補一下…
：「拿，呢個阿伯晚晚都嚟架！不過佢講英文嘅，你睇吓知唔知佢講咩？」
由做訪問開始，老伯就一直靜靜坐在旁邊，我還以為他是大叔的家人。
：「Write English. Don't write Chinese！」
擰過頭望望老伯，阿伯終於開聲了，還要一開聲就鬧我，嚇得我，老伯叫我記錄時不要寫中文，要寫英文。為免比陌生人當街鬧，唯有即刻撩幾個英文字。
：「呢個阿伯無人無物架，佢晚晚都落嚟同我傾計，雖然我好多時都唔知佢講乜亂應佢，佢好鍾意同我換錶戴架。」
根據二撇雞大叔所講，原來老一輩都喜歡「換錶」，付幾百元跟整錶師父買舊名錶，戴兩三日過過癮，賣回給師父就買另一隻，總算嘗試過戴幾萬元名錶的滋味。
「重建趕你走，你會去邊？」
：「大叔，拆樓你點算，仲會唔會繼續做？」
：「應該都仲有3年，麥當勞好似續咗約，之後睇吓佢（政府）會唔會劃個位比我啦，不過睇怕唔會，講咗咁耐得個拖字。」
我原本以為二撇雞大叔會喊苦，但他答得出奇地自然，還笑笑口，讓小編有點不懂應對，是大叔故作冷靜，還是他已經看淡了？沉默了幾分鐘，大叔先開聲。
：「阿妹，你覺得我需要街坊，定街坊需要我？」
原本小編想寫一個「時不與我」的故事，二撇雞大叔突然爆一句「街坊需要我」，我知我要改題了。
：「雖然而家人人都有十幾隻錶，壞咗隻都無所謂，但總有啲錶係特別有紀念價值，你好想整番郁佢，唔通下下拎番原廠整咩。」
無錯，二撇雞大叔的仔女都大了，生活其實不成問題，大可退休。為什麼他要繼續每日坐在街邊出汗呢？除了要消磨時間外，就是因為我們需要他，大叔頭頂突然多了個光環，致敬！
要做訪問，當然不可以兩手Fing Fing，難道第一句就劈頭問：「Hi我係記者嚟架，可唔可以做個訪問呢？」，肯定比人趕走。為表誠意，又不想買梳蕉咁老土，唯有從櫃桶底摷出一隻有點紀念價值的無電錶。換電加換錶帶，盛惠$100，老老實實，打了個突，但又不想失禮講價，唯有輕輕鬆鬆拿出一百蚊。
阿媽我又貼錢打工喇…
臨走前交換了電話，拋了一句「阿叔我好鍾意打冷架，搵日約你食飯！」，就是這樣，這夜我在路邊跟個新相識的朋友吹了3個鐘水，完。
港生活人氣本地熱話
【送禮🎁】送Esther Bunny春日好物🐰！
↓ 登記免費帶走可愛折疊傘 x 保溫杯 ↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
