文：cc

香港人對甜品的瘋狂程度無容置疑，每次出甜品（唔理咩味）都好多like，賣相最緊要，最好會出煙、識噴火，總之愈誇愈好！

在「靠樣搵食」這個世代之中，偏偏這間麥提莎糯米糍網店能站得住腳，而且愈做愈大，最近更於觀塘開設樓上店，不得不寫個服字！最最最最最重要的是，店主不是已經賺夠錢開店只想打發時間的太太，更不是二世祖，她只是一個連大學都未畢業的22歲小女生。

店主「琛琛」，個look跟名字一樣，是個可愛的陽光女孩，一見面就超熱情say hi，還未食lunch，帶點睡意的小編有點措手不及…「喂，hi，原來你就係琛琛！」配合一下，熱情少少先。

由網店開始賣麥提莎糯米糍，雖然不是打着「全港首間」這個威威的稱號，但大概也是最受歡迎的糯米糍店之一！看看Instagram的follower人數，「38.1k」，比港生活IG還要多…題外話：請大家follow @ulifestylehk：instagram.com/ulifestylehk，講完。

做了兩年多，由一個月先有一張單，到現在日日出貨，有市集接洽合作，最高紀錄一日賣12,000粒麥提莎糯米糍，注意，甜品全人手製作，叫小編一日畫12,000個圓圈我都想死！

讀多啲書先會發達，呢個道理你點睇？

琛：「我唔覺得背哂marketing堂教嘅PowerPoint就識做生意，開咗店，邊學邊做就識架啦！」

琛琛自認讀書不算標青，更不是修BBA科目，無論是找供應商、入貨，還是尋找合適的鋪位，都是一步一步，邊學邊做。

琛：「我有讀過吓econ嘅，淨係記得demand同supply囉，唔識架，demand多啲我咪要supply多啲囉，哈哈。」

讀者最關心嘅問題，錢，究竟你之前開網店賺到幾多錢？

咁計法，你開舖都使咗有50萬喎？

琛：「我開間鋪都接近用咗50萬數，咁我之前應該都賺咗50萬。」

這刻，小編的表情應該跟梵高那幅《吶喊》一樣，誰說大學生個個都是「廢青」！（咦唔係，吶喊好似唔係梵高畫嘅，我係廢青…）什麼？賣麥提莎糯米糍賺到幾十萬，為什麼我最初不好好的跟家人學廚呢…

香港人購物宗旨，顧客永遠是對的，有無遇過啲好黑人憎嘅客人？

琛：「好好彩，我啲客人大部分都好好，拎貨怕我攰會買野飲俾我，連去旅行都會買手信，我覺得同佢地嘅關係似好朋友多啲。」

應該全部都係香港客啦可？

琛：「唔係呀，澳門、台灣都有，太難忘啦所以做埋朋友keep住聯絡，佢叫我送糯米糍去佢地度，點送喎哈哈。」

純粹問問，誰知糯米糍真的已經衝出香港，嚇我一跳！可以交朋結友，我相信對琛琛來說，比賺多少錢都較為重要。

香港人好鍾意食甜品，你點睇？

琛：「係呀，真係好鍾意。可能係因為佢地試過整甜品，覺得甜品好有趣，又或者鍾意甜品賣相掛，而家出面的甜品都好靚，相機食先嘛。」

講起賣相，其實琛琛的甜品真的說不上「靚」，無裝飾可言，唯一的設計相估只是盒上的自家logo吧！臨走時，小編跟其他顧客傾傾計，他們都說麥提莎糯米糍的內涵已有滿分，根本不介意其賣相。事實證明，識噴煙噴火的甜品，不一定勝出！

由第一眼看到琛琛的甜品店，到跟她談製作、談客人，小編就不斷「起雞皮」，可能我真的有種「被小事觸動就想喊」的傾向。從頭到尾我都不覺得琛琛在「做生意」，熟客上到來就聊聊天，請他們吃東西，還給小編一個超級無敵低的優惠價，如果真的在「做生意」，早就蝕本了。小編反覺得琛琛似中學生做project，邊玩邊學發展自己的興趣，或許她沒有年老一輩的老練，不懂賺大錢的方法，但講到熱情和執着，琛琛不會被比下去，可能就是這份誠意和傻勁，令她「做吓做吓就有50萬」，「做吓做吓就開鋪做老闆」。

Sum Sum Dessert Workshop地址
http://hk.ulifestyle.com.hk/spot/detail.html?id=ABdGDVo2BwlZHgNp 

此文送給小編一位來不及完成夢想，這刻應該在天堂努力鑽研甜品的朋友。