正在閱讀
認住佢撇鬚!整錶大叔拆解做到最後一刻的原因,再介紹街頭的奇人異事

認住佢撇鬚!整錶大叔拆解做到最後一刻的原因,再介紹街頭的奇人異事

2015.06.13

文:CC 

 

上星期講完《霸氣酒樓阿姐的故事》,今個星期講乜好?

前幾日,一張「污糟手」相片觸動了好多人的情緒,直呼「污糟無罪!」。這張相片令小編想起很多辛勤勞動而換取生活的人,修車師父、地盤工人、清潔工人等等等等,有沒有遺漏呢?有!有日收工途徑觀塘,遇見了他。

(阿叔後生時應該幾靚仔)

我稱他做「二撇雞大叔」,從街坊與他的談話中,二撇雞大叔似乎很享受別人叫他的鬍子做「二撇雞」,亦好enjoy顧客欣賞他的鬍子。大叔一臉正氣,應該沒有太大「攻擊性」,膽粗粗的我就決定坐下來跟大叔談一談。

原來二撇雞大叔是潮州人,在香港生活多年,鄉音仍然很重。小編有時聽唔到,就唯有扮明,「係」、「哦原來係咁」、「知道知道」。大叔說自己好「大命」,小時逃過意外,逃過批鬥,家人朋友中就只有他能夠活着;後來打過魚,學人賣過豆腐花,最終跟街邊師傅學師,自己擺檔維修鐘錶,典型的香港老一輩。 

 

:「你整錶整咗幾多年呀?」

:「嘩唔記得囉,由銅鑼灣開鋪,到而家開檔,耐到我都唔記得啦!你估我幾多歲?」

:「55?」(估細3、4年,等阿叔開心吓)

(睇吓啲皺紋再估)

二撇雞大叔從銀包取出他的身份證,得意地show給我。

:「我67啦!你特登估細啲等老人家開心嘅!阿妹你呢?三十歲未?

我崩潰,三十歲!!雖然間唔中都有「天真的」小朋友叫小編做姨姨,但無論如何「阿妹」都不似30歲吧!阿叔,你好唔比面姐…

:「我22…」

(檔口貼住大叔細仔送的父親節禮物,so sweet!)

 

「份工悶唔悶?」

:「大叔,其實一日坐喺條街度咁多個鐘,無生意時有乜好做?」

:「聽收音機囉,我最鍾意聽陶傑。」

雖然二撇雞大叔說自己無文化,無讀書,但從他的談話中,小編覺得阿叔骨子裡根本就是一個博士。突然講句古文,突然叫我猜謎語,突然問我有無讀過xxx的詩,天啊,在大叔面前我根本就是個文盲,我是不是也要聽陶傑惡補一下…

(話說大叔咁啱收到一隻Baume & Mercier,問我「&」點解,仲叫我教佢寫,但佢寫極都只係寫到個「8」字,哈哈)

 

:「拿,呢個阿伯晚晚都嚟架!不過佢講英文嘅,你睇吓知唔知佢講咩?」

由做訪問開始,老伯就一直靜靜坐在旁邊,我還以為他是大叔的家人。

:「Write English. Don't write Chinese!」

擰過頭望望老伯,阿伯終於開聲了,還要一開聲就鬧我,嚇得我,老伯叫我記錄時不要寫中文,要寫英文。為免比陌生人當街鬧,唯有即刻撩幾個英文字。

(伯伯其實幾好人,係要迫我講英文姐)

:「呢個阿伯無人無物架,佢晚晚都落嚟同我傾計,雖然我好多時都唔知佢講乜亂應佢,佢好鍾意同我換錶戴架。」

根據二撇雞大叔所講,原來老一輩都喜歡「換錶」,付幾百元跟整錶師父買舊名錶,戴兩三日過過癮,賣回給師父就買另一隻,總算嘗試過戴幾萬元名錶的滋味。

(經過可以跟二撇雞大叔和他的「寵物」打聲招呼,注意,隻雀好嘈)

 

「重建趕你走,你會去邊?」

:「大叔,拆樓你點算,仲會唔會繼續做?」

:「應該都仲有3年,麥當勞好似續咗約,之後睇吓佢(政府)會唔會劃個位比我啦,不過睇怕唔會,講咗咁耐得個拖字。」

我原本以為二撇雞大叔會喊苦,但他答得出奇地自然,還笑笑口,讓小編有點不懂應對,是大叔故作冷靜,還是他已經看淡了?沉默了幾分鐘,大叔先開聲。

(雖然大叔講野大大聲,但整錶時溫柔過我同你) 

 

:「阿妹,你覺得我需要街坊,定街坊需要我?

原本小編想寫一個「時不與我」的故事,二撇雞大叔突然爆一句「街坊需要我」,我知我要改題了。

:「雖然而家人人都有十幾隻錶,壞咗隻都無所謂,但總有啲錶係特別有紀念價值,你好想整番郁佢,唔通下下拎番原廠整咩。」

無錯,二撇雞大叔的仔女都大了,生活其實不成問題,大可退休。為什麼他要繼續每日坐在街邊出汗呢?除了要消磨時間外,就是因為我們需要他,大叔頭頂突然多了個光環,致敬!

(開工必備 - 風扇加充電器,阿叔話唔好叫「尿袋」咁核突喎) 

 

要做訪問,當然不可以兩手Fing Fing,難道第一句就劈頭問:「Hi我係記者嚟架,可唔可以做個訪問呢?」,肯定比人趕走。為表誠意,又不想買梳蕉咁老土,唯有從櫃桶底摷出一隻有點紀念價值的無電錶。換電加換錶帶,盛惠$100,老老實實,打了個突,但又不想失禮講價,唯有輕輕鬆鬆拿出一百蚊。

阿媽我又貼錢打工喇…

(唔使諗喇 隻錶係假嘅)

 

臨走前交換了電話,拋了一句「阿叔我好鍾意打冷架,搵日約你食飯!」,就是這樣,這夜我在路邊跟個新相識的朋友吹了3個鐘水,完。

免費登記成為U Lifestyle 會員
即時接收最新資訊並盡享獨家優惠

免費登記成為U Lifestyle 會員
即時接收最新資訊並盡享獨家優惠