向西單位夠晒乾爽?但就算開冷氣都仲會好熱? 網民熱議:究竟向西樓買唔買得過?

2022.09.20

唔知大家認為座向係咪買樓其中一個需考慮嘅重要因素?單位嘅座向,邊一個方位先係最好?近日就有網民喺連登討論區上發文,表示自己睇樓睇啱一個座向向西嘅單位,但亦對「向西樓」有所保留,因而就尋求網民意見,問到底應唔應該買「向西樓」好,結果就引起一眾網民熱烈討論:到底「向西樓」買唔買得過?

「向西樓」唔怕潮濕?開冷氣、用遮光隔熱窗簾就唔怕熱?

樓主表示自己最近睇啱一間30多層樓高而座向向西嘅單位,但因自己同家人都非常怕熱,加上屋企有養狗,怕亦會因太熱的關係而令狗狗辛苦,所以就糾結應唔應該買呢個座向向西嘅單位好。而一眾網民對「向西樓」都有唔同嘅意見,有網民就認為「向西樓」雖然單位會比較熱,但有陽光照射入屋感覺會較神:「係熱啲,但係有陽光入屋,屋企都正氣啲」、「向西先正,如果前面無野(嘢)擋住,想有太陽,拉開窗簾就有,如果無太陽入屋果(嗰)d(啲),成間屋死氣沈沈,幾好間屋都無晒精神」,有網民則認為「向西樓」更適合香港比較潮濕嘅天氣:「香港太濕,向西南連昆蟲卜泥都少d(啲),收工返屋企成日有浸洗衣鋪味,曬下(吓)都乾淨d(啲)」、「只有廢老先見到向西樓唔買,日頭返工拉窗簾,曬衫一流,屋有天然陽光哂(曬)無咁易發霉,由(尤)其係住濕氣重地區更見效果」

有網民更認為「向西樓」會出現較熱的情況問題並不大,可開冷氣以及用上有遮光隔熱功能的窗簾便可解決:「向西先好,夠乾爽啲野唔臭,整個遮光隔熱窗簾布咩都搞掂啦,加上本身都開冷氣架(㗎)啦」、「熱,可以落遮光窗簾,果(嗰)d(啲)兩層設計,要100%遮又得、拉一層遮30%又得,再開埋冷氣,但唔夠光就無得救,屋無光入好大獲...」,有不少網民亦表示認同:「認同,遮光隔離(熱)窗簾就可以解決,想有陽光時又可以開窗簾」、「真,仲有日落睇,得啲傳統傻x仲覺得向西就係唔好,大佬現代有冷氣有遮光窗簾布喇,天氣熱時你本身都開冷氣架(㗎)啦,電費最多咪貴兩三蚊一日」,亦有網民認為其實當「向西樓」單位最熱最曬嘅時候多數人並唔會位於家中:「有工返多數8-7都唔係(喺)屋企,西斜真係冇影響」

有網民認為「向西樓」非常適合香港潮濕的天氣,有陽光照射入屋令人感覺更精神,而晾衫亦一流。

亦有網民認為使用遮光隔熱窗簾以及開冷氣就能解決「向西樓」較熱的問題。

向東向南單位更好?向西單位開冷氣關窗簾都仲好熱?
有網民就認為座向向西嘅單位過份地熱同曬,建議樓主唔好買「向西樓」:「唔好買西斜樓,少少西還好,正西食得屎,我住緊正西樓,高層,夏天一到兩三點,熱到好似焗爐咁」、「千祈唔好買向西樓,又熱又曬,買咗只會後悔。利伸:住緊向西樓」,亦網民認為其他座向嘅單位都會有陽光照射入屋之餘,亦唔會有向西單位咁熱:「你要曬衫向東一樣有日照,仲要冇向西夜晚熱嘅缺點,點計向西都係冇咁理想」、「向西、向南都住過,向西個(嗰)種熱係同係(喺)街一樣咁熱,一開門係有熱氣湧出黎(嚟),向南都會有光入屋,潮濕可以開抽濕解決」

有網民更表示就算開冷氣以及用上窗簾都不足以解決「向西樓」太過熱的情況:「住過一年向西樓不了,間屋開咗窗簾成個蒸爐咁,唔開窗簾都好焗」、「依家租緊正西樓,冷氣開完好似無x開過咁,400頭呎,個廳真係熱果(嗰)陣要開兩部先x得住,有啲野唔係窗簾冷氣搞得掂嘅野(嘢)黎(嚟),比(畀)我再揀真係唔會再(揀)向西」、「以前住過向西樓,就萛(算)拉埋窗簾布太陽落左(咗)山,但牆都仲係熱,預左(咗)夏天長開冷氣」,更有網民表示「向西樓」容易令大廈外牆出現裂痕:「啲石屎牆長期曬住,熱漲冷縮好易裂,一裂就漏水,係可以開冷氣,但啲熱力喺牆身散返出黎(嚟),如果張床靠牆夜晚訓(瞓)都訓(瞓)得唔舒服」

有網民認為向東以及向南的單位有足夠陽光照射入屋之餘,亦比起向西的單位更為涼快。

有網民則表示就算已經開冷氣以及關窗簾,住「向西樓」仍然會覺得熱。

向東朝早熱?向北冬天好凍?向海勁潮濕?
網民嘅討論亦引伸到其他座向嘅單位,有網民就認為向東嘅單位朝早會非常熱:「向東先難頂,每日早上曬到頂唔順」、「向東向西都住過,慣左(咗)遲起身,向東朝早係會熱醒」,有網民則表示向北/西北嘅單位最差:「西北最攞命,7,8月太陽直射入屋」、「住過開揚向西北,夏天高5度,冬天低5度,根本冇一刻想留喺屋企」、「最差係向北,冬天凍過響(响)街,屋企人寧願出街都唔想留響(响)屋企」,另外更有網民表示向海嘅單位潮濕問題嚴重,並唔好住:「其實向海一d(啲)都唔好住,住過全海景,勁潮濕,最大問題係濕氣太重個人好攰,果(嗰)時住左(咗)幾年個人長期眼訓(瞓),開抽濕機仲衰,好乾,乾到口唇都紅埋」

有網民認為其他座向的單位都各有不同的缺點,例如住向東的單位朝早會被熱醒、向北單位冬天特別凍、以及向海的單位會有嚴重的潮濕問題。

text/Jonathan
photo/HKET圖片庫

============
同場加映:
【蝸居睇樓團】大角咀納米樓18萬搞掂!衣櫃/儲物/梳化3合一、5大增空間感TIPS

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【隆重登場】香港咖啡地圖2022!↓

↓即睇精選50間咖啡店(附評分及介紹)↓

即睇精選50間咖啡店(附評分及介紹)

↓「App限時搶」大派現金券/禮品↓

↓記得逢星期三3PM入App搶!↓

記得逢星期三3PM入App搶!

評語

相關文章