四個屋苑都各有優點各有缺陷? 網民熱議:荔枝角「四小龍」邊一個屋苑最好住?

2022.09.21

昇悅居、宇晴軒、泓景臺以及碧海藍天呢4個位於荔枝角嘅私人屋苑多數被人喻為「四小龍」,由於其地理位置鄰近荔枝角港鐵站,交便極為方便,係唔少「上車客」嘅心水選擇,而究竟喺呢4大私人屋苑當中,邊一個屋苑又較突出較優秀呢?早前就有網民喺連登討論區上發文,問「四小龍」之一嘅昇悅居到底好唔好住,結果就引起網民嘅熱烈討論,一眾網民都紛紛發表各自對「四小龍」嘅唔同睇法!

昇悅居會所最好但景觀多數為樓景?

樓主表示「四小龍」之一嘅昇悅居為港鐵站上蓋嘅新鴻基樓,屋苑對面有D2 place等活化工廈,而兩房單位價錢對自己嚟講亦可接受,正在考慮入住當中,所以就想問一眾網民嘅意見。對於樓主嘅提問,一眾網民都提出各自對「四小龍」嘅意見,有網民就認為昇悅居為「四小龍」當中最好嘅屋苑:「如果純計四小入面嘅2房單位,昇嘅大兩房應該係最好。一入門口冇走廊夠實用,望入去成個廳空間感十足,擺位又flexible。大房有衣櫃位,仲可以輕鬆整到3邊落床」、「唔計景觀嚟講昇最高質(會所,用料,管理),其他三個都麻麻地,利(伸)住過泓同昇,有frd住宇同碧」,但有網民就認為昇悅居景觀差以及較為殘舊:「垃x圾,落到樓下得個細商場,乜都冇得買,樓又殘,景差,碧海個環境叫好啲,但行得遠」、「昇最差,係正中間好多都係樓景,向南又貴,向D2又嘈,反而泓,宇,碧,多開揚景」

碧海藍天景觀一流但離港鐵站遠

而有網民就認為碧海藍天雖然離港鐵站較遠,但景觀一流之餘又近街市、超市:「碧海應該最好,但較遠離地鐵,廳大房大,景觀好」、「碧海有AEON、海達街市、又靚VIEW,係遠離黨(港)鐵,打風落雨濕硬」,但有網民就指昇悅居於交通以及大堂裝修方面比碧海藍天更好:「個人認為昇大兩房>碧,昇lobby靚好多,又有SHK光環,大房衣櫃位大過碧嗰個。交通直落荔枝角站無懸念,碧要光廁就硬食呂字廳,個人接受唔到黑廁,平台嗰層lobby設計核突到好似靈灰閣咁。行去南昌同去荔枝角差唔多咁遠」,亦有網民認為碧海藍天及昇悅居都均適合於有養狗嘅人士:「四小有得養狗好似得碧同昇?隔離(籬)過條馬路就係狗公園,同埋D2一期多寵物野(嘢)賣,天台又有得放狗,對想住市區又養開狗嘅人應該係唔錯嘅選擇」

泓景臺用料差?只有宇晴軒可打通單位?

有網民則指出「四小龍」各屋苑都有各自不同嘅優劣:「除非望到海景,昇仔同宇仔望內園慘x過困獸鬥,樓景密麻麻又唔通風,四小基本上每個屋苑都有缺陷無完美,碧海要搭港鐵返工係玩自己,最近公屋又最兩頭唔到岸,泓仔朝早10點前入港鐵亦要兜小小路,不過起碼個室外泳池都仲襟睇啲,泓仔、宇仔黑廁又唔係人人接受到」、「住過晒4小龍,最唔recommend宇晴,佢唯一好處係你有錢的話佢可以打通晒兩個單位而其餘3小做唔到,會所就昇悅居最見得人同埋佢係地鐵站上蓋,10點前得佢可以係商場直入,碧海係遠但有aeon同而家去海達街市方便,同埋個景無咁侷促,泓景,普普通通,諗唔到好又諗唔到壞」、「宇同昇都係出大堂兩三步就接到地鐵,碧海積大實用,會所最廢,但遠好多,泓就長實不了,4小龍中料最差」

有網民認為昇悅居於單位開則、會所、用料以及管理等方面為「四小龍」當中最優秀。

有網民則認為碧海藍天在景觀以及購物方面都比其餘「四小龍」中的屋苑更好。

亦有網民指出「四小龍」各屋苑都各有缺陷,例如泓景臺用料差、碧海藍天離港鐵站遠、昇悅居景觀差以及宇晴軒廁所設計為「黑廁」等。

「四小龍」名大於實?奧運、荃灣有更好選擇?

另外,網民嘅討論亦引伸到「四小龍」喺整體上究竟好唔好住,有網民就認為「四小龍」好住程度其實只屬一般:「四小龍老實講吹大左(咗),工廠區,又唔係新,配套一般」、「四小龍都麻麻地,樓下個商場冇乜好行,周圍除左(咗)D2外就係工廠、貨倉、家禽批發市場、勁多塵嘅公路馬路,附近想環境好少少都要行到去荔枝角公園。唯一好處應該係可以有蓋去黨(港)鐵」、「4小龍最大缺點就係困樓景,要開揚就貴」,亦有網民指出有一些私人屋苑比「四小龍」為更好嘅選擇:「四小平均都成千萬,呢個價不如諗全城滙,睇中原成交500呎左右都係差唔多錢,但新好多,落樓搭車唔洗(使)開遮,近鐵路,民生野(嘢)仲齊過荔枝角」、「奧運靠海,有真維港景,奧海城夠大,近旺角但又無旺角咁雜咁舊,過朗豪坊又近,旺中帶靜,娛樂方面完勝,民生野(嘢)過條橋有旺角街市,又有奧運站可以直去中環,接近直去機場,地段同環境同樓宇設施客觀上睇係完勝四小既(嘅)」

為市區中相同價錢下最佳選擇?最適合有小朋友的家庭?

不過亦有網民指「四小龍」為市區當中屬價錢合理、交通方便以及配套完善嘅私人屋苑:「市區兩房8.5m, 4小無得輸嫁(㗎)喇。樓age20年,屋苑有配套,九龍鐵上蓋」、「睇唔睇價錢先,睇價錢既(嘅)話咪好住,8xx萬500尺(呎)九龍近鐵(偽上蓋)大屋苑廿年樓兩房,市區樓景觀就冇架(㗎)啦,係方便囉」、「見好多留言踩四小真係得啖笑,同樣價錢,樓齡20年內,要係大型屋苑要市區,附近有aeon 、有學校、有街市,交通有大量巴士線,有黨(港)鐵(除咗碧海,一滴雨都唔駛(使)淋),自己揸車西隧過海唔駛(使)半粒鐘,同價錢同級根本無對手」,有網民則認為「四小龍」較適合有小朋友嘅家庭所居住:「我覺得四小係啱有小朋友既(嘅)家庭,四小樓下有5個商場(四小+海麗邨),主要買日用品,又有AEON,又有超市、餐廳、便利店,你想購物娛樂既(嘅)話行去對面D2 place一期二期都只係過2條馬路,2分鐘都唔洗(使)就去到」

有網民認為「四小龍」名大於實,整體上並非十分好住,附近街道有多個工廠、貨倉等,而奧運以及荃灣的私人屋苑則為更好的選擇。

亦有網民認為「四小龍」屬市區中同價錢底下最優秀的私人屋苑,有齊交通方便、配套完善等優點。

text/Jonathan
photo/HKET圖片庫

============
同場加映:
【蝸居睇樓團】大角咀納米樓18萬搞掂!衣櫃/儲物/梳化3合一、5大增空間感TIPS

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【送禮】請您同毛孩免費住酒店!↓

↓立即分享寵物照片 贏走獎品!↓

↓立即分享寵物照片 贏走獎品!↓

↓正嘢!《社群》專區登錄App↓

↓必睇人氣生活+美食主題深度關注組↓

 ↓必睇人氣生活+美食主題深度關注組↓

評語

相關文章