【年宵2019】一文睇晒5大年宵花市！10大精選豬年新春產品

珍珠奶茶就飲得多，珍豬奶茶又見過未？位於銅鑼灣維園年宵的珍豬母攤檔售賣多款攬枕，其中最得意的就係一大隻豬仔在珍珠奶茶杯頂（＄228），仲有多款珍珠甜品攬枕，同樣有隻為食豬喺上面，非常吸引！另外印有豬仔日常的Tote bag都唔錯架～

豬仔士多同樣位於維園年宵，其中午餐豬（＄198）和豬古力牛奶（＄188）攬枕好受歡迎，另一款豬仔薯片攬枕（＄298）內有4個不同造型的豬仔公仔，仲可以拎出嚟玩！

同樣位於維園年宵的堅系朱豬s，將多個經典卡通人物變身豬仔，包括有蠟筆小新、多啦A夢、小丸子、龍珠、美少女戰士等等，售賣的產品有布袋（＄68）、貼紙（＄98）。另外仲有香港特色小食媽咪麵同魷魚絲的豬仔版文件夾（＄20），童年回憶返晒黎！

除了維園年宵，旺角花墟年宵都有好多得意精品！「文德豬寶店」由聖文德書院的學生經營，售賣多款不同造型的豬仔公仔擺設，肥嘟嘟好可愛！大家經過不妨支持下這一班學生哥！

旺角花墟年宵內的「豬肥屋潤」攤檔售賣多款自家設計的豬仔錢罌，不同搞鬼造型錢罌有齊一家大小的豬仔，豬仔身上仲印有不同祝福語，如掌上明珠、豬事順利、豬肥屋潤、我愛豬妻等，買一個儲起啲利是錢一流～另外仲有Tote bag同豬仔風車賣，行過可以留意下！

近期豬仔耳仔帽非常流行，旺角花墟年宵內「挽豬格格」攤檔都買到！只要按一下帽子，一雙耳仔就會郁，好可愛！另外仲有其他豬仔主題產品包括豬屁股暖手枕同豬仔利是封等。

長沙灣/深水埗年宵內有不少香港插畫家的攤檔，當中包括人氣大大與小妹、本地插畫家業餘空少飛Sun等等，去開記得支持一下啦！

位於元朗年宵的Pig pig ice cream售賣多款由小朋友親自設計的攬枕，表情好豐富，有心心眼、打氣樣、嬲嬲樣等，攬枕更是以小朋友本人做設計藍本，只此一家！另外亦有豬仔雪糕筒的公仔($168)，豬仔大頭攬枕（$128），全部都好可愛！

未買賀年裝飾的朋友可以去觀塘年宵117號攤擋睇睇，攤檔有多款原創揮春，上面有唔少潮語，如「科科攞A」、「食極唔肥」、「發到豬頭」、「撈咩都掂」、「衝3爆4」、「出pool成功」等，相當有新意！

《學是學非》粉絲就一定要支持一下由一班節目主持人開設的觀塘年宵攤檔，商品不但印有一眾「是非精」的樣貌，購買產品仲有機會同主持人合照！當然唔少得多款豬年精品，如攬枕、風車、豬仔頭套、地墊等，粉絲記得去支持下啦！