潮文《申請綜援全攻略》　教出三糧其實唔難！

文：仙人掌妹妹

財爺尋日公佈財政預算案，領取綜援人士嚟緊會有得出三糧（係三糧！！！），小妹不禁對住自己份糧單唏噓一番……look look 手機，見到小姓奴《一日之計在於晨》不滿今次預算案，於是在其fb專頁寫了篇《申請綜援全攻略》，教人索性都申請綜援一份，攻略多多搞笑，少少實用，可以同大家分享一下。

1. 《斷六親》

由於申請綜援時係以家庭做單位，想避過所有麻煩成功申請，作者表示首先就要斷六親！因為屋企總有啲「有骨氣」人士阻住你發達，而且多隻香爐多隻鬼，越多人申請，金額就分得越薄，蝕哂。要斷六親，你可以簽份「父母不供養自己證明書」，社署問起就租間$1500劏房，表明父母唔養自己先搬出去住。全家以個人做單位去申請，唔使計都知道多啲錢啦！

2. 《辭職》

第二步就係要通過入息審查，攻略教路，申請前要先辭工，有綜援後就可以不勞而獲！如果同個上司熟，仲可以叫佢寫封信，證明你「因智力問題不能完成工作」，遲啲有用。

3. 《洗底》

除了入息審查，當然唔少得資產審查。作者教申請前要洗哂戶口的錢，賣哂所有股票、外幣同黃金，記得係要洗哂唔好「轉贈」俾家人或朋友，因為社署會追到3年內賬目。有樓都賣埋佢啦，有綜援使乜做樓奴。

4. 《準備家訪》

申請完社署就會安排查家宅，就得收埋哂所有值錢東西，唔好漏咗高達！作者話，想穩陣就學番兩句「內地用語」傍身，要將牛肉講哂牛油喎，但真正的新移民勝數始終會高啲囉…

5. 《申請後福利》

成功申請後，你每月就可以得到$2070標準金，生多幾個細路連租金、水費、排污費都有特別津貼；住屋方面，只要唔好租過$1500的屋就無問題，傻豬嚟嘅，$1500又點會租到樓呢！所以，作者就教你瞓兩日天橋底，再同社署反映，咁就可以大大增加上公屋機會啦！跟住再拎住張綜援紙，原來連病都唔使驚，在公立醫院睇病完全免費，仲可以賣番醫生開的藥俾藥房，無本生利(咁都得?)。嫌唔夠錢用，你仲可以打斷哂手手腳腳，拎埋殘疾津貼！

6. 《申請後被搵工》

此時此刻，你應該已經un un腳生活無憂，但作者話社署唔係善男信女，它會迫你參加培訓乜乜乜同實習工作，迫你出去搵工。部署咁辛苦？點可以被打亂如此安穩生活呢，這時候，Step 2那封「因智力問題不能完成工作」證明書就有用啦，社署仲分分鐘俾多筆錢你去睇心理醫生添，諗起就爽！

最啜核的是這份《申請綜援全攻略》特別提醒，綜援有離港限制，一年唔可以離港超過56日，未必夠你去5次歐洲旅行，但唔緊要啦，近近哋，去10次台灣咪得囉！ 

如果…我話如果咋，如果小妹做足哂以上步驟，拎到的綜援金額夾埋慳到的錢，會唔會多過份糧呢？嗯，做人都係唔好有太多幻想......腦細又催我稿喇，bye!

來源：https://www.facebook.com/onedayopenfromtheson/photos/a.179440318771634.44886.155880857794247/811795645536095/?type=1&theater

相關連結：