傻的嗎？荃灣啲天橋竟然多到連到20商場...(Part 2)

文: C

上回講到邊？呀，荃灣好多橋丫嘛，行咗十個商場，我仲未返到落地球表面，原來由荃灣站一直去到悅來，只係成個天空之城嘅三分一。行咗十個場呀，演唱會都超時喇，唯有開Part 2寫埋落去。

出面落緊雨，無帶遮添，但我未驚過，點解呀？因為我喺荃灣呀！唔駛擔遮齋行天橋都行到20個商場呀！下次落雨去邊度行街好呀？心照啦！

新城之路 

回歸原點，今次由南豐新之城(11)開始Part 2，相比六度空間，南豐無咁多食肆，亦無咁噏耷(up dup)，通常去嚟買下牛肉乾零食、篤下魚旦。

行入去就係荃錦(12)同新領域(13)，然後就到「新城之路」，中途經過荃灣公共圖書館添。

呢條橋，好長呀大佬，清朝嗰陣話整條行人電梯，講咗五千幾年，力生都無老翻賣啦，扶手都未見到一柄。

終於到喇... 呢個係中染新城(14)，仲要行多個橋口先到愉景新城(15)。識行梗係行SPAO啦，係咪咁講呀潮人。

條橋真係好長，愉景之後佢仲有得去，終於去到荃景圍體育館見盡頭。

最終決戰 - 荃新至大會堂 

又回歸原點 - 荃灣站，係時候一嘢行去荃灣西站，頭也不回！

提提大家，經歷咗咁多嘢，原來我仲未返到落地面。

力生廣場(16) （頂頭先寫錯力新添，多謝下面留言Andy，我飲大左），以前好風光架，一百蚊七隻丫嘛，即使而家已經無晒老翻店，每次行過都仲好似聞到以前睇4仔嗰堆阿叔陣煙臭咁，好親切。

呢條通向荃新同大會堂嘅橋，真係好壯觀，係成個堅離地城嘅核心。

如果諸葛亮黎到荃灣，見到呢個空中要塞，都會自愧不如，八陣圖都唔敢拎出黎。（求墳場新聞追訪）

荃新天地可謂荃灣近年地標，呢度有橋駁住荃新一期(17)、如心廣場(18)同荃新二期(19)，仲有條「餸胃橋」，通埋向楊屋道街市同體育館。

最後，就係大會堂至荃灣廣場(20)條橋。

音樂噴泉呢？無咗嘅？

終於落得地喇... 咪住，仲有條橋通去祈德尊新邨!!

原本仲有條橋可以通埋去灣景廣場，不過2013年起已經封咗，埋尾臨到荃灣西站先黎斷鏈，可惜（話2018年開返，好似係）。人生，總要有一點缺陷美。

終於(真係)落得地，埋單計，呢個空中要塞，相連咗20個商場、兩個體育館、兩間酒店、一個大會堂、仲有街市... 死啦我驚數漏。自己睇wiki啦。 

荃灣，比堅尼地城更堅係離地，橋橋相交嘅建築景觀下體現人類無限欲望(Unlimited Wants)嘅基本人性。

離地飄行嘅感覺，係爽。

以後搞馬拉松唔駛封路啦，搞荃灣天橋馬拉松（荃馬）就掂啦，行一圈都幾公里，你咪話無得搞。  

照咁睇，荃灣所有商場設施好快就可以一橋搞掂。

「仲過紅綠燈？你傻架？呢度係荃灣呀！ 」

後記：中環個天空版圖仲勁？但係荃灣一站式搞掂生活所需喎！ 哈哈哈哈

傻的嗎？荃灣啲天橋竟然多到連到20商場...(Part 1)：

http://hk.ulifestyle.com.hk/topic/detail.html?id=ABFGD1ozBw5ZEwNv 

相關連結：