好混亂啊！香港另外10大中英不對應的街名
文：DL
自《Translate Server Error? 香港十大中英不對應的街名》一文出街後，小編收到/見到唔少網友提供嘅街道名。唔講唔知，原來香港嘅街道名都幾混亂下。
1.差不多先生在荃錦公路
荃錦公路係連接荃灣同錦田嘅主要幹道，有趣嘅係佢英文名唔係「Tsuen Kam Road」，而係令人不明所以嘅「Route Twisk」。原來此道路原本叫「TW / SK」，其中TW代表荃灣（Tsuen Wan），SK則代表石崗（Shek Kong）。但後來官員誤將TW/SK中的斜綫當成字母I，就變成「Route Twisk」啦。古有馮京當馬凉，今有/當字母i，都係差唔多啫。
2.松樹街定杉樹街？
大角咀有兩條街，一條叫松樹街（Fir Street），一條叫杉樹街（Pine Street)。咦等等，英文好嘅人可能會覺得我打錯左，明明「Fir」係解杉樹，「Pine」係解松樹，點解中英文掉轉左嘅？你問我我點知啫，自己問政府啦!
3.研究顯示：漢字序順並不定一影閱響讀（小編特登嘅）
但似乎呢個研究並不適用於街名，中環有條街叫列拿士地臺（Rednaxela Terrace)，望住呢個英文名，你可能會問，你講乜呀？但當你將佢掉轉讀就應該明白（Alexander Terrace）。
話說佢原本係叫「Alexander Terrace」， 但係登記時被職員倒轉睇，就變成「Rednaxela Terrace」啦。 連CNN都有報導過呢條街（原文），算唔算柒出國際呢？
4. Amoy Street係咩？
「Amoy Street」好多人都唔知係咩，但一講廈門街就係人都識，原來「Amoy」係廈門嘅舊名，留意下香港嘅街道名可以搵返好多中國地方舊稱，例如汕頭街（Swatow Street）、北京道（Peking Road）、廣東道（Canton Road）等等。
5.淞字點讀？
位於佐敦嘅吳松街（Woosung Street）原本係以上海市吳淞區命名，叫做「吳淞街」，「淞」的粵音為「鬆」，但大部份人都將佢讀錯做「松」音，後來習非成是，政府索性將「吳淞街」改為「吳松街」，但英文名維持不變，就變成而家咁中英讀法不同啦。
6.馬六甲定馬來？
位於紅磡嘅馬來街（Malacca Street）以馬來西亞城市馬六甲（Malacca）命名。但譯者將「Malacca」誤譯作「馬來」，或者我重申一次，「Mala」同「Malacca」係唔同架！
7.雜誌空隙道
位於半山的馬己仙峽道（Magazine Gap Road)一般人望住個英文可能唔知佢講乜。原來「magazine」除左解作雜誌外，亦可解作「軍火庫」，佢係以道路所繞著的前英軍軍火庫命名。但其中文使用音譯，馬己仙峽道都幾好聽呀。
8.大強街
北角有條街叫大強街。放心，大強唔係指大嘅小強。佢英文叫「Power Street」，因鄰近的北角發電廠而得名。「Power」一字應是指電力，據說翻譯者誤解作「國際列強」就變成「大強街」。
9.歡樂的性病診所
位於尖沙咀的樂道（Lock Road）就咁睇好似無問題，但原來英文Lock解性病診所，街名因昔日鄰近的性病診所而得名，但中文音譯就變左咁正面嘅樂道，係勁嘅！
10.海防道唔關海軍事
海防道（Haiphong Road）雖然係海邊，但原來係呢度唔係指海上防禦，而係越南城市「海防」，明曬！
再次感謝各位網友提供嘅意見。仲有咩有趣嘅香港街名，歡迎繼續留言話畀小編知。
港生活人氣本地熱話
【送禮🎁】送Esther Bunny春日好物🐰！
↓ 登記免費帶走可愛折疊傘 x 保溫杯 ↓
↓【限時搶⚡】又一城歡天雪地溜冰門票↓
↓假日消遣首選｜約埋親友享受滑冰體驗↓
