小學時期　你一定去過的10個地方

文：DL

小學雞年代每次參觀活動，總會去啲千奇百怪的地方。今次小編同大家精選左十個大家必定到過的參觀地點，等大家搵返少少童年回憶。

1.交通安全城

話說係70年代，政府係秀茂坪起左第一個交通安全城，係一種模擬道路環境的公園結果大受歡迎，從此交通安全城熱潮一發不可收拾。市政局先後係北角、沙田同屯門興建多三個交通安全城，由香港警務處道路安全組的警務人員教育小學生有關道路安全的意識。從此成為每個小學生必到嘅地方。其實我除左依稀記得個度有單車玩之外，都唔太記得自己做過啲咩，但印象中都幾好玩嘅。

 片：youtube@citysammy

2.嘉道理農場

嘉道理農場是位於大帽山的農場及植物園。雖然平時大家可能無幾可會去，但小學雞年代幾乎一定跟過大隊去參觀。個度有山有水有雞有豬，我諗唔少人都係個度第一次見到平時食開嘅食物生勾勾咁出現係面前。至於當時有咩感受？十幾年前嘅野鬼記得咩。

圖：fb＠嘉道理農場

3.鐵路博物館

又一個每人都去過但又無咩印象的地方。位於大埔嘅鐵路博物館係前大埔墟火車站，據官方資料顯示，可以「找到香港鐵路交通發展的點點滴滴：舊火車站的古蹟和訊號室、窄軌蒸汽火車頭、古董車廂、與實物大小相同的電氣化火車車廂模型及歷史圖片等。」依稀記得當年我對得風扇無冷氣嘅火車感到好新奇。老師，典解會咁嘅?

童年回憶

圖：旅發局

4.海下灣

當年小六(好似係)，老師安排我地去海下灣坐玻璃船睇珊瑚，興奮左成晚。去到海下灣先係個沙灘到搵海洋生物做工作紙，然後行一段路，上左架玻璃船。我原本以為架玻璃船成個底都係玻璃，結果去到大失所望，個底得一格格嘅膠片，算，船嘅野我唔計較。但點解水係綠色，個講解員所指嘅珊瑚似石頭多過似珊瑚嘅。從此之後，我對香港珊瑚失去所有幻想。

我以為海底應該係咁 

圖：PIXAR

5.海洋公園

海洋公園長年都有平價學生飛優惠，當年去到好似係入左海洋館，仲親身摸到海洋生物添，媽呀，我得左啦！

6.益力多廠/可樂廠

想當年我地兵分兩路，一班同學去益力多廠，一班去可樂廠。除左可以學下益生菌有咩用外，仲可以試下新鮮益力多同埋參觀工場運作，都幾得意架。話時話，點解當年的廣告唔見曬嘅。

圖：hk港生活

7.麥理浩夫人度假村

麥理浩夫人度假村位於西貢，無論你係去畢業營定乜營麥營都好，都一定去過呢個全香港最出名嘅度假村。個度好多野玩架，有射箭、繩網、卡啦ok等等，我人生第一次射箭好似都係度射。

去camp 啦啦啦啦

圖：康文署

8.學童牙科診所

無論你係被威迫定利誘，都一定曾經去過學童牙科診所做檢查，每次去到洗牙係指定動作，有時仲會教埋你刷牙。我人生中有唔少嘅牙都係個度無左，嗚呀！但佢每次睇完牙，都會比餅動畫碟你，都幾好睇架。

 童年陰影

 圖：衛生署

9.學生健康服務中心

由小學到高中，每年都總要去一次身體檢查，幫你由頭check到落腳，記得當年去個陣幫我檢查嘅係女醫生。唉，往事不堪回首。細路，除左件衫，瞓係張床度！

10.各大博物館

香港各大博物館經常會舉辦各種千奇百怪的展覽，總有一次老師會帶你地去。而小編有個朋友細個時，學校去旅行時竟然去左歷史博物館……尖沙咀三寶(歷史博物館、太空館同科學館)相信大家都印象深刻，其實細路去下呢啲地方幾好嘅，只要唔好旅行日去就得啦。

 圖：旅發局

>>延伸閲讀：

《童年回憶 10種令你食到啜手指的零食》

《「好大陣籮味傳入我鼻」這16句兒童打油詩　80、90後的你小時候實講過》